Policia e Shtetit ka reaguar sërish për ngjarjen e ndodhur në Selenicë ditën e sotme ku u raportua se shpërthimi i një bombole gazi i mori jetën rrugës për në spital shtetasit D.G.
Policia në njoftimin e dytë thotë se vendi i shpërthimit nuk ka qenë brenda banesës së viktimës por jashtë saj.
Hetimet vijojnë për të përcaktuar se çfarë ka shpërthyer dhe shkakun e shpërthimit.
“Në lidhje me informacionin paraprak të dhënë mëngjesin e sotëm, sipas të cilit, një shtetas njoftoi sallën operative të DVP Vlorë, se në banesën e fqinjit të tij, shtetasit D. G., kishte shpërthyer një bombol gazi dhe si pasojë e shpërthimit, shtetasi D. G. humbi jetën, gjatë rrugës për në spital, ju informojmë se:
Nga veprimet paraprake hetimore të kryera nga grupi i posaçëm hetimor, rezulton se vendi i kësaj ngjarjeje nuk është brenda banesës së shtetasit D. G., por në territorin e jashtëm të banesës së këtij shtetasi.
Grupi hetimor dhe ekspertët xhenierë, në drejtimin e Prokurorisë, vijojnë punën intensive për zbardhjen e rrethanave të kësaj ngjarjeje, për të përcaktuar çfarë ka shpërthyer, si dhe për të përcaktuar shkakun e shpërthimit.
Në vijim do të informoheni për më shumë detaje mbi këtë ngjarje”-njofton policia.
