Kryetari i Partisë Socialiste, Edi Rama ka zgjedhur qytetin e Shkodrës për të mbyllur fushatën elektorale për zgjedhjet e 14 majit.
Rama tha se Benet Beci është kandidati ideal për Shkodrën sepse nuk fokusohet në ndarjet partiake por vetëm në punën që duhet bërë për të mirën e bashkisë.
“Nuk e kam menduar se do e gjenim një kandidat kaq ideal që të ketë punuar me atë tjetrin. Me mua ka punuar sepse unë i kam vlerësuar punën. Në atë lloj xhungle ka qenë ndër të paktit që dilte në pah si shembull me punën e tij. Beneti, kështu është i urtë por në TV ka pas bërë debate kundër nesh. Ky nuk kandidonte për asgjë po dilte mbronte zotin Berisha sic i thotë ai. Megjithatë kjo për mua nuk përbënte problem sepse Beneti kishte treguar se ishte njeriu i duhur për ta menaxhuar Fondin Kombëtar të Zhvillimit.”
Rama tha se rrugën Shkodër Velipojë nuk e bëri Beneti me Berishën por e bëri qeveria me Benetin e cila është investim strategjik.
Rama shtoi se Shkodra është i vetmi qytet në vend që i ka të gjitha nga natyra por fatkeqësisht nuk po menaxhohen siç duhet. Kryeministri duke bërë krahasimet me qytetet e tjera për turizmin, tha se Shkodra ka kontrast të madh duke mos patur numur të madh turistësh, por që dëshira e tij është që Shkodra të kthehet në një motor ekonomie.
“Rrugën Shkodër Velipojë nuk e bëri Beneti me Berishën por e bëmë ne me Benetin dhe është investim strategjik, është të ndërtosh një tjetër aks strategjik për ekonominë e turizmin shqiptar. Rrugën Shkodër- Theth nuk e bëri Beneti me Berishën por ne me Benetin. Së bashku me rrugën Shëngjin-Velipojë e anasjelltas që është ende në ndërtim. Ata thonë i kemi bërë detyrat tona po r a i kanë marrë lekët e shpronësimit njerëzit. Dëmshpërblimet e përmbytjeve nuk bëhen. Ai që Beneti e quan zoti Berisha e ka shumë të thjeshtë formulën, ka pasur njerëz plot që e kanë marrë sapunin dhe e kanë ngrënë për djathë parmixhano. I humburi më i madh që nga viti 1992 në Shqipëri është Shkodra, më i madhi, Nuk ka humbur sa Shkodra askush tjetër se askush si Shkodra nuk i ka dhënë mbështetje më të madhe atij që Beneti i thotë Zoti Berisha. Shkodra megjithëse ka nga zoti dhe nga natyra më shumë se gjithë të tjerët, ka sot më pak se gjithë të tjetër. Askujt zoti nuk i ka dhënë si bekim më shumë se Shkodrës. Puna është ti thuash bravo atyre që nuk e kanë lënë këtë dhuratë të zotit të kthehet në mërzi. Zoti askujt nuk i ka dhënë lum liqen det mal e alpet mbi kokë. Historia jonë që ka qenë shumë koprrace me shqiptarët, megjithatë Shkodrës prapë i ka dhënë shumë, i ka dhënë bekimin e shumë figurave të mençura në këtë vend. Ka vetëm një gjë që nuk funksionon këtu, vota, ka shkuar në mënyrë të vazhdueshme në drejtimin e gabuar dhe duke i thënë përmes votës bëni çfarë të doni ata janë sjellë gjithmonë e më keq, se unë nuk e kuptoj dot ndryshe pse kjo është bashkia më e ndotur e Shqipërisë. Vota që i është dhënë atyre aq bujarisht pa i kërkuar llogari, pse të zgjohet herët njeriu nëse e ka rrogën e garantuar, si pastruan si nuk pastruan do t thonë prapë votën do na e japin se do të luftojmë komunizmin. Si i morën apo jo votat këtu nuk përcakton a jemi qeveri në qendër nuk jemi ne që paguajmë është Shkodra që paguan. Të ketë Korça 400 mijë turistë në vit dhe Shkodra mos të arrijë as 100 mijë. Të shkojnë çdo fundjavë 3 mijë njerëz në Belsh dhe mos të ndodhë kjo në SHKODËR, pse duhet të ketë kontrast kaq të madh. Të kesh inat kalin e për inat ta lësh karrocën në tako është budallëk, s’je i detyruar me përkëdhel kalin merr karrocën e fillo punë. Po mirë hyp sipër karrocës e ngre dy gishta duke thënë fitore, po pastaj? Pse në Theth ka plehëra ndërsa në Bogë jo? Sepse Boga është e Malësisë së Madhe. Dua që Shkodra të futet në makinën e madhe ku janë motorët e ekonomisë. Në Vlorë nuk ndalonte njeri, kalonin e iknin poshtë se nuk kishte ku rrije. Po them ngaqë na erdhi mundësia të bëjmë projekte, kompleksin turistik me marinën e teatrin, të bëjmë dhe ndërhyrjen te liqeni nga Zogaj në Shirokë, që është pjesë si të ndezim motorët e ekonomisë e pastaj nuk do të jetë Shkodra që do të ketë zili Vlorën e Korçën por do të jenë ato që do të kenë zili Shkodrën.”- tha Rama në Shkodër.
