Mynihu nuk ishte vetëm mikpritës i një konference sigurie të shtunën, por ishte gjithashtu në qendër të demonstratave të shumta kundër luftës.
Rreth 10,000 protestues u mblodhën në sheshin “Königs” të qytetit jugor gjerman – një nga më shumë se një duzinë demonstrata në të gjithë qytetin që mblodhi së bashku protestues anti-NATO, pacifistë dhe aktivistë pro-kurdë, përcjell Euronews.
Ndërkohë, në Odeon Plaza, u mbajt një tubim pro-Ukrainë, duke bërë thirrje për më shumë ndihmë ushtarake dhe mbështetje ndërkombëtare për vendin e shkatërruar nga lufta.
Protestat vijnë pas dy ditësh bisedime në Konferencën e Sigurisë në Mynih, ku liderët evropianë dhe ekspertët e sigurisë u zotuan të intensifikojnë mbështetjen për Ukrainën ndërsa ajo lufton me trupat ruse.
Presidenti francez Emmanuel Macron tha se besonte se nuk ishte momenti i duhur për të hapur bisedimet me Moskën.
“Nuk është koha për dialog sepse ne kemi një Rusi që ka zgjedhur luftën, e cila ka zgjedhur të intensifikojë luftën dhe që ka zgjedhur të shkojë deri në kryerjen e krimeve të luftës dhe të sulmojë infrastrukturën civile”, tha ai.
Ndërsa këmbënguli se nuk donte të shihte një luftë të zgjatur, ai tha se Franca ishte gati për një “konflikt të zgjatur”.
Ndërkohë, kancelari Olaf Scholz theksoi se mbështetja gjermane për Kievin ishte “projektuar që të zgjasë” dhe u kërkoi aleatëve të pëshpejtonin dërgesat e tankeve të rënda të premtuara në Ukrainë.
