Një ‘pajisje gjurmuese kineze’ e fshehur dhe ‘gjëra të tjera shqetësuese’ u gjetën në një inspektim të fundit të sigurisë së automjeteve të qeverisë së Mbretërisë së Bashkuar, raportoi iNews të premten, duke cituar burime të inteligjencës.
Kontrolli u krye në mes të frikës në rritje për veprimtari të dyshuara spiunazhi të Pekinit dhe Moskës në vend, sipas shkrimit.
Sipas raportit, ‘pajisja gjurmuese’ doli të ishte një kartë SIM e aftë për të transmetuar të dhënat e vendndodhjes. Pajisja ishte vendosur në një pjesë të mbyllur të një automjeti, të importuar nga një furnizues në Kinë dhe besohet se është instaluar nga prodhuesi i makinës, pohoi burimi i gazetës.
Pajisja ‘i jep mundësinë për të vëzhguar qeverinë për një periudhë muajsh dhe vitesh, duke regjistruar vazhdimisht lëvizjet.’, tha burimi për gazetën.
Kartat SIM janë të zakonshme në automjetet moderne dhe instalohen nga prodhuesit për qëllime të ndryshme, të tilla si mbledhja e komenteve mbi paraqitjen e makinës. Nuk ishte menjëherë e qartë nëse pajisja e gjetur ishte apo jo pjesë standarde për mjetin përkatës.
Zyrtarët kinezë kanë mohuar fuqimisht përfshirjen e Pekinit në aferën e ‘pajisjes gjurmuese’, duke e hedhur poshtë raportin për kartën SIM si ‘thashetheme të pabaza’ dhe një përpjekje për të njollosur prodhuesit kinezë.
“Ne jemi kundër manipulimit politik mbi bashkëpunimin normal ekonomik dhe tregtar ose çdo shpifje ndaj ndërmarrjeve kineze.” – tha një zëdhënës i ambasadës së Kinës në Mbretërinë e Bashkuar për gazetën.
“Qeveria kineze gjithmonë nxit kompanitë kineze që të bashkëpunojnë në tregtinë e jashtme dhe investimet në përputhje me ligjet vendase, si dhe me parimet e tregut dhe rregullat ndërkombëtare. Ne jemi me vendosmëri kundër lëvizjeve të disa njerëzve për të tepruar qëllimisht me konceptin e sigurisë kombëtare për të shkatërruar ndërmarrjet kineze.” – vijoi reagimi.
