Gjermania përballet me një rrezik serioz për të falimentuar për shkak të paaftësisë së qeverisë për të gjetur një zgjidhje të qëndrueshme për krizën e energjisë, tha nënkryetari i Bundestagut, Wolfgang Kubicki, në një intervistë të botuar në gazetën kombëtare të së dielës Bild am Sonntag.
Sipas zyrtarit, gjermanët tani kanë përshtypjen se vendi i tyre është në rrugën për t’u bërë një ‘shtet jofunksional’.
“Infrastruktura, çmimet e energjisë dhe paaftësia e ushtrisë për të na mbrojtur janë sfida që kërkojnë veprim të menjëhershëm nga autoritetet gjermane, përndryshe gjërat do bëhen më keq”, tha ai.
Kubicki sulmoi ministrin e Ekonomisë Robert Habeck për blerjet e gazit natyror të lëngshëm (LNG) nga Katari, Emiratet e Bashkuara Arabe dhe SHBA duke paguar shuma të mëdha, ndërsa në të njëjtën kohë kundërshtoi të nxjerrë gazin më të lirë argjilor në Gjermani ‘për arsye thjesht ideologjike’.
Ai shtoi se autoritetet gjermane duhet të rishikojnë qasjen e tyre ndaj termocentraleve bërthamore, të cilat duhet të vazhdojnë të funksionojnë ndërkohë që vendi po përballet me një krizë energjetike.
“Ne nuk duam më furnizime me gaz dhe naftë nga Rusia, në të njëjtën kohë miqtë tanë ‘të gjelbër’ po rihapin termocentralet me qymyr, duke parandaluar një zgjatje të arsyeshme të jetëgjatësisë së termocentraleve bërthamore,” tha Kubicki, duke komentuar mbi vendimet e fundit të Habeck
Deputeti bëri thirrje për ndryshimin e strategjisë së qeverisë dhe kundërshtimin e ndihmës së tepërt financiare përballë krizës energjetike.
“Nëse vazhdojmë të ndjekim politikat e pagimit të parave për vite të tëra si pjesë e luftës kundër krizës energjetike, atëherë jemi në rrezik të falimentimit kombëtar ose të kthimit në socializmin shtetëror”, paralajmëroi Kubicki.
Sipas tij, fondet që Berlini planifikon të shpenzojë për blerje shtesë të burimeve të energjisë në mes të krizës fillimisht ishin të destinuara për investime në fusha të tjera.
