Në një email informues periodik që u çon partive e organizatave partnere në Evropë, Partia Demokratike duket se e ka bërë fakt të kryer lidhjen mes kreut të grupit parlamentar Taulant Balla me vrasjen e avokatit Ravik Gurra, ngjarje e ndodhur më 22 mars 2019.
Megjithatë ky pretendim është i pavërtetuar.
Ajo që është zbuluar deri tani janë zhdukjet e interceptimeve për masakrën e Elbasanit të 3 shkurtit 2016 ku u vranë 3 persona e u plagosën 8 të tjerë.
Përgjimet ndaj Ballës ishin bërë një ditë pas masakrës, më 4 shkurt, megjithatë dy ditë më pas prokurorët e cilësuan lapsus vendimin duke i kërkuar gjykatës anulimin e tij.
Akuzat ndaj deputetit socialist janë bërë nga avokati i Ardian Çapjas në gjyqin ndaj këtij të fundit e implikimi i Ballës dyshohet se është bërë si strategji për t’u mbrojtur në gjykatë.
