James Gordon Meek, një gazetar hulumtues i ABC News, fitues i çmimit Emmy, i cili raportoi për histori të lidhura me ushtrinë dhe sigurinë kombëtare, është zhdukur që prej një bastisjeje të FBI-së në shtëpinë e tij në fund të pranverës, raportoi revista ‘Rolling Stone’ të martën.
Gazetari nuk është parë apo dëgjuar publikisht që kur autoritetet federale bastisën banesën e tij në Virxhinia më 27 prill. Postimi i fundit në Twitter i tij u bë në orën 5 të mëngjesit ditën e mbërritjes së agjentëve të FBI-së.
ABC News, ku Meek kishte punuar për nëntë vjet, ka konfirmuar gjithashtu se ai ‘u dorëhoq krejt papritur’ nga rrjeti pak para zhdukjes së tij. Kolegët e tij në rrjet thonë se thjesht ‘u zhduk nga faqja e dheut’.
Sipas ‘Rolling Stone’, Meek ende nuk është akuzuar zyrtarisht për ndonjë gjë dhe natyra e bastisjes së FBI-së është e paqartë, teksa autoritetet kundërshtojnë të komentojnë ose të zbulojnë ndonjë dokument në lidhje me rastin, duke përmendur një hetim në pritje.
Megjithatë, duket se veprimet e forcave të zbatimit të ligjit janë autorizuar nga një gjyqtar, i cili nënshkroi urdhërarrestin një ditë para bastisjes.
Burime anonime, megjithatë, i thanë gazetës se Meek, i cili kishte publikuar disa histori të profilit të lartë në lidhje me gabimet e qeverisë dhe ushtarisë gjatë karrierës së tij, mund të ketë poseduar informacion të klasifikuar në laptopin e tij.
Avokati i Meek, Eugene Gorokhov, iu përgjigj thashethemeve duke deklaruar se klienti i tij ishte ‘i pavetëdijshëm për akuzat që po bëjnë burime anonime për posedimin e tij të dokumenteve të klasifikuara’.
“Nëse dokumente të tilla ekzistojnë, siç pretendohet, kjo do të ishte brenda fushës së karrierës së tij të gjatë si gazetar hulumtues që mbulonte keqbërjet e qeverisë.” – shtoi Gorokhov.
‘Rolling Stone’ raporton se në muajt para zhdukjes së tij, Meek po punonte për një libër të quajtur ‘Operation Pineapple Express: Historia e pabesueshme e një grupi amerikanësh që ndërmorën një mision të fundit dhe nderuan një premtim në Afganistan’, i cili mbulonte tërheqjen kaotike të SHBA-së nga vendi i shkatërruar nga lufta.
Libri do botohej nga ‘Simon & Schuster’. Megjithatë, pas bastisjes në shtëpinë e tij, emri i Meek u hoq nga të gjitha materialet e shtypit në lidhje me librin dhe një foto e kopertinës u zhduk nga biografia e tij në mediat sociale.
Nënkoloneli Scott Mann, një ish-anëtar i Beretave të Gjelbra të Ushtrisë Amerikane, i cili ishte bashkëautor i librit, i tha gazetës se Meek e kontaktoi atë në pranverë dhe ishte ‘me të vërtetë i shqetësuar’.
“Ai më tha se kishte disa probleme serioze personale dhe se duhej të tërhiqej nga projekti.” – shtoi Mann.
