Vendosni fjalën kyçe....

Media që nisi “zhurmën” nxjerr intervistën e avokatit: Vëllezërit Hysa s’kanë lidhje me narkotrafikantët


Në foto: Arben Hysa dhe avokati i tij

E njëjta media nga ku nisi së pari “zhurma”, El Universal ka publikuar intervistën e avokatit të vëllezërve shqiptarë Hysa, i cili rrëzon çdo lidhje të tyre me krimin e organizuar e aq më tepër me kartelin e Sinaloas.

Siç shkruan media meksikane, avokati Marcelo Falce García ka mohuar akuzat ndaj katër biznesmenëve shqiptarë Luftar, Arben, Fatos dhe Ramiz Hysa se ata pastrojnë para për kartelin Sinaloa, përmes kazinove dhe bizneseve në sektorin e turizmit.

Kjo media në muajin shtator, publikoi një artikull ku thuhej se autoritetet e inteligjencës zbuluan se narkotrafikanti Ismael Zambada García, i njohur ndryshe si “El Mayo”, ishte lidhur me biznesmenë në aktivitete të supozuara të paligjshme në Meksikë dhe Shqipëri.

Megjithatë, këshilltari ligjor i pronarëve të kazinosë Falce García, siguroi median se vëllezërit Hysa janë njerëz punëtorë dhe nuk kanë pasur kurrë probleme apo lidhje me krimin e organizuar.

“As në aspektin më të vogël të biznesit nuk mund të ketë parregullsi apo paligjshmëri në funksionimin e tij, aq më pak që këto biznese dhe këta njerëz të jenë të lidhur me krimin e organizuar.”- tha ai.

Lidhur me hetimet ndaj klientëve të tij, Falce García shpjegoi se nisën nga një ankesë anonime që vendosën mos ta ndiqnin: “Personalisht, asnjëherë nuk më është dërguar një thirrje për deklarim, aq më pak, besoj se ata hetuan kontekstin e ankesës dhe përcaktuan se faktet e raportuara nuk ishin të vërteta dhe vendosën të mos ushtronin veprime kriminale.” 

Gjithashtu, avokati sqaroi se kazinotë nuk funksionojnë me prokurë dhe se fakti që vëllezërit Luftar dhe Arben, nëpërmjet kompanisë së tyre, Palermo Entertainment, marrin pjesë në investime biznesi në Shqipëri, nuk nënkupton pastrim parash, por më tepër një aktivitet tregtar në një komunitet të cilit i përkasin.

“Asnjë kompani në të cilën marrin pjesë si aksionerë vëllezërit Hysa nuk ka marrë, transferuar apo rimbursuar asnjë shumë parash që mund të konsiderohet e paligjshme, aq më pak pastrim parash.”– theksoi avokati sipas gazetës.

Falce García tha se bizneset shqiptare nuk kanë pasur kurrë probleme me njerëzit që kërkojnë të drejtën e tokës në kazino dhe as ai me shërbimet këshillimore ligjore që u ka ofruar biznesmenëve europianë prej disa vitesh.

“Unë jam një profesionist individual dhe me zyrën time në qytetin e Monterrey-t, nuk kam asnjë lidhje me organizatat e krimit të organizuar dhe aq më pak shoh çështje të pastrimit të parave. Në zyrën time nuk i sheh ato lloj padish, ato lloj problemesh. Ne jemi plotësisht të pavëmendshëm ndaj krimit të organizuar dhe pastrimit të parave.”- tha ai.