Presidenti ukrainas Zelensky akuzoi forcat ruse për kryerjen e krimeve të luftës dhe kërkoi më shumë armë për luftën, në një intervistë me Reuters të premten.
Udhëheqësi ukrainas veçoi Gjermaninë, ku tha se trashëgimia e nazistëve krijon ‘barriera psikologjike’ për dërgimin e armatimeve të rënda.
Zelensky tha se varrezat masive në rajonin e Kharkovit ishin gjetur që përmbanin ‘varre të shumë njerëzve’, duke përfshirë ‘familje të tëra’, disa prej të cilëve ishin torturuar. Ai pohoi se ‘ka disa prova’ se ishin kryer krime lufte.
Parcelat e varreve që shiheshin në disa nga fotot ishin shënuar me kryqe që lexonin ‘VSU’, shkurtesa ruse për ‘Forcat e Armatosura të Ukrainës’.
Zelensky ka akuzuar vazhdimisht Rusinë për kryerjen e krimeve të luftës, duke përfshirë bombardimin e një materniteti në Mariupol dhe vrasjen e civilëve në Bucha. Moska e përshkroi ngjarjen e parë si një ‘provokim të organizuar’ nga Ukraina, dhe akuzat e fundit si të rreme.
Në intervistën me Reuters, Zelensky bëri thirrje që më shumë vende t’i dërgojnë armë ushtrisë së tij.
“Do të donim më shumë ndihmë nga Turqia, do të donim më shumë ndihmë nga Koreja e Jugut. Më shumë ndihmë nga bota arabe. Nga Azia,” – tha ai.
Duke iu drejtuar Gjermanisë, e cila kundërshton të dërgojë tanket e saj, Zelensky pohoi se gjermanët kanë ‘barriera të caktuara psikologjike’ për rritjen e dërgesave të armëve, që rrjedhin nga e kaluara e tyre naziste.
