Ish-zëvendëspresidenti amerikan Al Gore e ka çuar retorikën e tij për ndryshimet klimatike në lartësi të reja, duke i krahasuar ‘mohuesit’ me oficerët e policisë që nuk arritën të rrëzonin agresorin në një shkollë që vrau 19 fëmijë dhe dy mësues në maj në Uvalde, Teksas.
“Mohuesit e klimës janë me të vërtetë në një farë mënyre të ngjashëm me të gjithë ata pothuajse 400 oficerë të zbatimit të ligjit në Uvalde, Teksas, të cilët prisnin jashtë një dere të hapur ndërsa fëmijët po masakroheshin.” – tha Gore të dielën në një intervistë për NBC News.
“Ata dëgjuan britmat, dëgjuan të shtënat dhe askush nuk doli përpara.”
Gore, i cili humbi zgjedhjet presidenciale të vitit 2000 ndaj republikanit Xhorxh W. Bush, tha se amerikanët duhet të bashkohen për t’iu përgjigjur krizës klimatike.
“Përballë kësaj emergjence globale, ajo që po bëjmë me mosveprimin tonë dhe dështimin për të ndërhyrë dhe për të ndaluar vrasjen nuk është tipike për atë që ne jemi të aftë si qenie njerëzore.” – tha ai.
Gore, 74 vjeç, u bë zëri kryesor i aktivizmit për ndryshimet klimatike. Ai ka bërë disa pretendime dramatike në lidhje me kërcënimin e klimës, të tilla si parashikimi se ‘kapaku i akullit polar verior ka të ngjarë të zhduket deri në vitin 2013 dhe se bota do të arrinte një pikë pa kthim deri në vitin 2016 nëse nuk do të merreshin masa drastike’.
Dokumentari i tij i vitit 2006 ‘E vërteta e papërshtatshme’, që fitoi 50 milionë dollarë, e përshkruante pjesën më të madhe të Floridës duke u fundosur nën ujërat në rritje dhe duke thënë se nuk do të kishte më borë në malin Kilimanjaro të Afrikës brenda një dhjetëvjeçari.
