Plani i administratës Biden për të shitur katër dronë të mëdhenj në Ukrainë është ndërprerë nga frika se pajisjet e saj të sofistikuara të vëzhgimit mund të bien në duart e armikut, sipas dy personave të njohur me këtë çështje.
Kundërshtimi teknik ndaj shitjes u ngrit gjatë një shqyrtimi më të thellë nga Administrata e Sigurisë së Teknologjisë së Mbrojtjes të Pentagonit, e ngarkuar me pengimin e rënies së teknologjisë me vlerë të lartë nga duart e armikut.
Më parë plani, i cili ka qarkulluar që nga marsi, ishte miratuar nga Shtëpia e Bardhë, thanë tre persona.
Plani për t’i shitur Ukrainës katër drone MQ-1C Grey Eagle që mund të armatosen me raketa Hellfire për përdorim në fushën e betejës kundër Rusisë u raportua për herë të parë nga Reuters në fillim të qershorit.
Kundërshtimi për eksportin e dronëve u ngrit për shkak të shqetësimeve se radarët dhe pajisjet e vëzhgimit në dronët mund të krijonin një rrezik sigurie për Shtetet e Bashkuara nëse bien në duart e Rusisë.
“Rishikimet e sigurisë së teknologjisë janë një praktikë standarde për transferimin e armëve të mbrojtjes së SHBA-së te të gjithë partnerët ndërkombëtarë. Të gjitha rastet shqyrtohen individualisht. Përmes procesit, shqetësimet e sigurisë kombëtare ngrihen në autoritetin e duhur miratues.” – tha zëdhënësja e Pentagonit, Sue Gough.
Vendimi nëse do ecet para apo jo me marrëveshjen tani po shqyrtohet më lart në zinxhirin komandues në Pentagon.
