Anëtarët e BE-së dhe vendeve të tjera evropiane janë në një gjendje paniku për shkak të fluksit të refugjatëve nga Ukraina, deklaroi të dielën presidenti turk Rexhep Tajip Erdogan.
Duke folur para mbështetësve të partisë së tij në qytetin Kizilcahamam, Erdogan tha se ndërsa Turqia ‘ka 11 vjet që po menaxhon me sukses emigrimin e parregullt me origjinë nga Siria, ne po shohim panik në Evropë si rezultat i krizës Ukrainë-Rusi’. Kreu i shtetit turk vazhdoi të shprehte shpresën se ‘bota do të dalë sa më shpejt nga periudha kritike që po kalon’.
Që kur Rusia sulmoi Ukrainën në fund të shkurtit, gati 14 milionë ukrainas janë zhvendosur, sipas një raporti të publikuar të premten nga Amin Awad, ndihmës sekretari i përgjithshëm dhe koordinatori i krizës i Kombeve të Bashkuara për Ukrainën. Gjashtë milionë nga këta njerëz besohet se kanë ikur në vendet fqinje.
Vendet anëtare të BE-së si Polonia, Rumania dhe Hungaria kanë qenë ndër destinacionet kryesore, përveç Rusisë, për refugjatët ukrainas.
Përveç çështjes së emigrimit të shkaktuar nga konflikti në Ukrainë, Erdogan preku edhe aplikimet e Suedisë dhe Finlandës për anëtarësim në NATO, të cilat u dorëzuan në mes të majit, duke përmendur një kërcënim të perceptuar nga Rusia.
Presidenti turk e bëri të qartë se Ankaraja do vazhdojë t’i bllokojë këto dy kombe që të bashkohen me bllokun ushtarak ‘derisa të përmbushen pritshmëritë e saj’.
Për shkak se pëlqimi njëzëri i 30 anëtarëve të NATO-s është i nevojshëm që anëtarët e rinj të pranohen në aleancë, kundërshtimet e Turqisë në fakt kanë pezulluar shpresat e dy vendeve nordike për t’u bashkuar në çdo kohë së shpejti.
Ankaraja këmbëngul se do zhbllokojë pranimin e tyre vetëm nëse ndalojnë të strehojnë njerëz të lidhur me grupin militant të Partisë së Punëtorëve të Kurdistanit (PKK) dhe organizatat e tjera kurde që Ankaraja i konsideron terroriste.
Një tjetër shtyllë mosmarrëveshjeje është vendimi në vitin 2019 nga Stokholmi dhe Helsinki për të vendosur një ndalim të shitjes së armëve në Turqi pas sulmit ushtarak të Ankarasë në veri të Sirisë kundër militantëve kurdë. Turqia kërkon që ai të hiqet.
Gjatë fjalimit të tij të dielën, Erdogan argumentoi gjithashtu se ‘sistemi që Perëndimi ka ndërtuar për të mbrojtur sigurinë dhe mirëqenien e tij është duke u shkatërruar’.
Ai bëri thirrje për një reformë të madhe të Këshillit të Sigurimit të OKB-së, duke vënë në dukje se ‘Toka është më e madhe se’ ato pesë kombe. Presidenti turk tha gjithashtu se ka të dhëna se vendet perëndimore do të miratojnë përfundimisht sugjerimet që Ankaraja ka bërë prej vitesh në këtë drejtim.
