Kryebashkiaku Erion Veliaj thotë se ai ka synim që deri në fund të këtij mandati, Tirana të ketë 10 mijë kodues.
Këtë deklaratë ai e bëri gjatë fjalimit të tij në Forumin Ekonomik të Tiranës, ku u diskutua mbi dixhitalizimin dhe fokusimin e të rinjve te teknologjia e informacionit.
“Në vitet 2000 ne bëmë një tranzicion nga ajo që quhet industria fason, në atë të shërbimeve, kryesisht call-center. Ndërsa sot, ky është momenti për të bërë një tjetër kapërcim, nga call-center në data-center dhe në industrinë digjitale. Në Tiranë sot kemi rreth 4600 mijë kodues. Por, ambicia ime si kryetar i Bashkisë është që në fund të këtij mandati të kemi 10 mijë kodues.
Kjo është arsyeja pse i kemi liberalizuar shkollat e inxhinierisë së softuerëve, duke nxitur të vijnë në Tiranë ‘Hoxton Academy’, ‘Holberton School’, ‘Micro Folie’, ‘TUMO Center’, ‘Ecole 42’ dhe ‘Factory Berlin’. Ambicia është që 1% e popullsisë sonë të jenë kodues profesionistë sepse kjo është puna e së ardhmes, që mund t’i bësh edhe nga shtëpia, që nuk kërkojnë të largohesh jashtë vendit, por këto janë edhe punët që paguhen më mirë.”– u shpreh Veliaj.
Më tej Veliaj u shpreh se kryeqyteti aspiron anëtarësimin në BE, por së pari sipas tij është me rëndësi që “Europën ta krijojmë këtu”.