Një gjykatë turke ka dënuar aktivistin e të drejtave civile dhe filantropistin Osman Kavala me burgim të përjetshëm pa lirim me kusht.
Gjykata në Stamboll e shpalli Kavalën fajtor për përpjekje për të përmbysur qeverinë mes protestave masive në vitin 2013.
Shtatë të pandehur të tjerë u dënuan gjithashtu me 18 vjet burg të hënën mes kritikave në sallën e gjyqit.
Vendimi vjen pasi organi më i lartë evropian për të drejtat e njeriut, Këshilli i Evropës, nisi procedurat për shkelje kundër Turqisë për këtë rast, raporton Euronews.
Ankaraja nuk ka respektuar një vendim të Gjykatës Evropiane të të Drejtave të Njeriut në vitin 2019, i cili ka kërkuar lirimin e menjëhershëm të Kavalës.
Kavala, i cili tashmë ka kaluar më shumë se katër vjet në burg – mohon akuzat se ka financuar protestat antiqeveritare. Në deklaratat e tij të fundit të mbrojtjes të premten, Kavala tha se pretendimet “nuk janë të besueshme”.
“Fakti që kalova katër vjet e gjysmë të jetës sime në burg është një humbje e pariparueshme për mua”, tha ai në gjykatë me videokonferencë.
“Ngushëllimi im i vetëm është mundësia që përvoja ime të kontribuojë në një kuptim më të mirë të problemeve të rënda të gjyqësorit [turk]”.
64-vjeçari është burgosur në burgun e Silivrit — në periferi të Stambollit — që kur u ndalua në tetor 2017.
Grupet e të drejtave të njeriut thonë se Kavala është ndjekur penalisht me prova të kufizuara dhe se të drejtat e tij themelore janë shkelur.
Kavala u lirua fillimisht në shkurt 2020 nga akuzat që e lidhnin atë me protestat e parkut Gezi të vitit 2013.
Por, ndërsa mbështetësit prisnin lirimin e tij, Kavala u arrestua përsëri me akuza të reja që e lidhin atë me një përpjekje për grusht shteti të vitit 2016, për të cilën qeveria turke ka fajësuar një rrjet të klerikut mysliman me bazë në SHBA, Fethullah Gulen.
Ky akt më vonë u rrëzua dhe rastet u bashkuan.
Gjykata Evropiane e të Drejtave të Njeriut tha në vitin 2019 se burgimi i Kavalës synonte t’i mbyllte gojën atij dhe mbrojtësve të tjerë të të drejtave të njeriut.
Një proces i vazhdueshëm shkeljesh për këtë çështje mund të çojë në pezullimin e të drejtës së votës së Turqisë ose anëtarësimit në Këshillin e Evropës.
Erdogan ka hedhur poshtë procesin e shkeljes, duke thënë se Turqia “nuk do t’i njohë ata që nuk i njohin gjykatat tona”.
Në tetor, ndalimi i vazhdueshëm i Kavala-s shkaktoi një krizë diplomatike midis Turqisë dhe 10 vendeve perëndimore pasi ata bënë thirrje për lirimin e tij.
Presidenti turk Rexhep Tajip Erdogan ka akuzuar Kavalën se është “dega turke” e filantropit miliarder amerikan George Soros dhe kërcënoi se do të dëbojë të dërguarit perëndimorë për ndërhyrje në punët e brendshme të Turqisë.
