Udhëheqësit e Gjermanisë, Spanjës dhe Portugalisë kanë dalë në krah të presidentit francez Emmanuel Macron në raundin e dytë të ardhshëm të zgjedhjeve, duke paralajmëruar votuesit kundër mbështetjes së rivales, Marine Le Pen.
Në një lëvizje befasuese të enjten, tre ditë para votimit në Francë dhe në mes të ofensivës së vazhdueshme të Rusisë në Ukrainë, kancelari gjerman Olaf Scholz, kryeministri spanjoll Pedro Sanchez dhe kryeministri portugez Antonio Costa botuan një kolonë të përbashkët në gazetat ‘Le Monde’ dhe ‘El Pais’.
Pasi pretenduan në fillim të artikullit se ‘agresioni’ i presidentit rus Putin synon jo vetëm Ukrainën, por edhe vlerat që Franca dhe partnerët e saj evropianë mbrojnë, autorët e artikullit arritën te pika e tyre kryesore.
Sipas Scholz, Sanchez dhe Costa, ‘populistët dhe e djathta ekstreme’ në vendet e tyre ‘e kanë bërë Vladimir Putin një model ideologjik dhe politik, duke i bërë jehonë kërkesave të tij nacionaliste’.
Kjo nuk duhet harruar, pavarësisht se sa politikanë të tillë ‘po përpiqen të distancohen nga agresori rus’, theksuan liderët, ndoshta duke iu referuar mohimeve të shumta të Le Pen lidhur me simpatinë e saj për Kremlinin.
Prandaj, argumentojnë autorët, raundi i dytë i zgjedhjeve franceze nuk është ‘një zgjedhje si të tjerat’, veçanërisht duke pasur parasysh se ‘Franca ka qenë një vend qendror në projektin europian’.
“Është zgjedhja midis një kandidati demokrat, i cili beson se Franca është më e fortë në një Bashkim Evropian (BE) të fuqishëm dhe autonom dhe një kandidati të së djathtës ekstreme, i cili haptazi mban anën e atyre që sulmojnë lirinë dhe demokracinë tonë…” thanë ata.
Duke përshkruar përfitimet e supozuara të ‘solidaritetit më të madh europian’, Scholz, Sanchez dhe Costa nuk e humbën rastin të kritikojnë mbështetësit e Brexit, të cilët, sipas mendimit të tyre, kanë sjellë vetëm probleme të ndryshme për Mbretërinë e Bashkuar.
Uniteti është mënyra e vetme për të ruajtur mirëqenien, për të ‘arritur globalizimin në mënyrë njerëzore’ dhe për të ‘mbrojtur paqen dhe rendin ndërkombëtar’, thuhet në shkrim.
“Kjo është arsyeja pse ne kemi nevojë për Francën në anën tonë.” – zbuluan Scholz, Sanchez dhe Costa.
Ata specifikuan më tej se ata kishin nevojë për Francën, e cila ‘mirëpriti mërgimtarët që ikën nga diktaturat e Frankos dhe Salazarit’ dhe që ‘mbron drejtësinë kundër liderëve antidemokratikë si Putini’.
Artikulli i Scholz, Sanchez dhe Costa shkaktoi jo pak habi në Rusi, me zëdhënësen e Ministrisë së Jashtme Maria Zakharova që e quajti me sarkazëm nismën e politikanëve ‘ditë të javës së demokracisë’.
Duke shkruar në Telegram, Zakharova tha se kishte dy pyetje:
“Pra, a është e mundur që lideri i një vendi të mbështesë kandidatin presidencial të një vendi tjetër? A nuk konsiderohet kjo ndërhyrje në zgjedhje tani?” shkruante ajo, duke iu referuar me sa duket faktit se Perëndimi prej vitesh akuzon Moskën për ndërhyrje në zgjedhjet e huaja.
Pyetja e dytë e Zakharovës lidhet me ekuilibrin gjinor.
“Po balanca gjinore në zgjedhje? A nuk është më një faktor? Apo në demokracitë e zhvilluara, kur është në rrezik pushteti real sesa të drejtat e deklaruara, gjinia nuk ka rëndësi?” – shkruajti ajo.
Ndërkohë, sondazhet e fundit sugjerojnë se Macron mund të mos ketë nevojë për një mbështetje kaq të hapur nga kolegët e tij evropianë. Sondazhi i ‘Opinion Ëay’, i kryer të enjten me 1334 pjesëmarrës, zbulon se 56% e elektoratit janë gati të mbështesin presidentin aktual, me 44% të përgatitur për të votuar për Le Pen.
