Ukraina ka ndaluar zyrtarisht të gjitha importet nga Rusia për shkak të operacionit ushtarak të Moskës në tokën e saj, njoftoi të shtunën ministrja e Ekonomisë, Yulia Svyrydenko.
“Sot shpallim zyrtarisht ndërprerjen e plotë të tregtisë së mallrave me shtetin agresor. Tani e tutje, asnjë produkt i Federatës Ruse nuk do të mund të importohet në territorin e shtetit tonë.”, shkroi Svyrydenko në Facebook.
Ajo shtoi se hapi u ndërmor për të siguruar që Rusia të mos përdorë paratë nga tregtia e ndërsjellë për të financuar operacionin ushtarak.
Rusia ishte një nga partnerët kryesorë tregtarë të Ukrainës përpara se Moska të niste operacionin ushtarak më 24 shkurt, me importe vjetore të vlerësuara në rreth 6 miliardë dollarë.
Megjithëse shkëmbimi i mallrave dhe shërbimeve midis dy vendeve është bërë praktikisht inekzistent gjatë gjashtë javëve të fundit, Kievi nuk i kishte ndërprerë zyrtarisht lidhjet tregtare me Moskën deri në njoftimin e së shtunës.
Në postimin e saj, Svyrydenko u kërkoi vendeve të tjera të ndjekin shembullin dhe të vendosin sanksione më të ashpra ekonomike ndaj Moskës, pavarësisht faktit se rreth 30 shtete, përfshirë SHBA-në dhe pjesën më të madhe të BE-së, kanë bombarduar tashmë Rusinë me kufizime dhe ndalime të shumta.
Për momentin, ato kanë frenuar kryesisht një embargo ndaj importeve ruse të energjisë, pasi shumë vende, veçanërisht brenda BE-së, janë shumë të varura nga energjia ruse.
