Kryeministri polak Mateusz Morawiecki dhe zëvendëskryeministri Jaroslaw Kaczynski, kryeministri çek Petr Fiala dhe kryeministri slloven Janez Jansa mbërritën në Ukrainë dhe janë nisur për në Kiev, njoftoi të martën zyra e kryeministrit polak.
“Rreth një orë më parë, treni i kryeministrit, zëvendëskryeministrit Jaroslaw Kaczynski dhe kryeministrave të Republikës Çeke dhe Sllovenisë kaluan kufirin polako-ukrainas”, shkroi zyra në Twitter.
Udhëheqësit do të takohen me presidentin ukrainas Volodymyr Zelensky dhe kryeministrin Denys Shmyhal në Kiev. Qëllimi i takimit është të shprehë mbështetjen e qartë të Bashkimit Evropian ndaj sovranitetit dhe pavarësisë së Ukrainës dhe të diskutojë një paketë të gjerë masash mbështetëse.
Sipas zëdhënësit të qeverisë polake Piotr Müller, takimi u ra dakord pas konsultimeve me Presidentin e Këshillit Evropian Charles Michel dhe Presidenten e Komisionit Evropian Ursula von der Leyen, me qëllim dërgimin e ‘një sinjali të fortë për paqen’.
Moska sulmoi fqinjin e saj në fund të shkurtit, duke e akuzuar Kievin se kishte dështuar për të zbatuar kushtet e marrëveshjeve së Minskut lidhur me rajonet separatiste të Donetskut e Luganskut.
Rusia tani ka kërkuar që Ukraina të shpallet zyrtarisht një vend neutral që nuk do të anëtarësohet kurrë në NATO. Kievi këmbëngul se ofensiva ruse ishte plotësisht e paprovokuar dhe ka mohuar pretendimet se po planifikonte të rimarrë të dy republikat me forcë.
