Trashëgimia e Luftës së Dytë Botërore, e cila pa Ushtrinë e Kuqe Sovjetike të dëbonte trupat naziste nga Evropa Lindore përpara se të shkatërronte Rajhun e Tretë, rrezikon të rrëmbehet nga ata që kërkojnë të shfajësojnë krimet e Hitlerit ose të fshijnë kontributin e Bashkimit Sovjetik, ka pohuar ambasadori i Moskës në SHBA.
Duke shkruar në një artikull të botuar të enjten në gazetën konservatore amerikane ‘The Ëashington Times’, Anatoly Antonov argumentoi se vendet e ish-Bllokut Lindor tolerojnë kremtimin e nazizmit dhe refuzojnë të njohin rolin kyç të Bashkimit Sovjetik në mposhtjen e fuqive të Boshtit gjatë Luftës së Dytë Botërore.
“Ne jemi dëshmitarë të një politike cinike të shtrembërimit të së vërtetës historike,” shkroi diplomati. “Përkujtimoret për fitimtarët e fashizmit janë shkatërruar në Ukrainë, në shtetet baltike dhe në Poloni. Ekziston një dëshirë e vetëkuptueshme për të fshirë kujtimin e veprës së ushtarit-çlirimtar sovjetik, të cilin ata përpiqen ta vënë në pozitë të barabartë me xhelatët e Hitlerit.” – shtoi ai.
Ai pretendoi se ‘disa vende të Evropës Lindore organizojnë rregullisht marshime për të nderuar divizionet ndëshkuese SS’, duke festuar organizatën paraushtarake naziste përgjegjëse për vrasjet e miliona hebrenjve, romëve dhe viktimave të tjera gjatë Holokaustit.
Prillin e kaluar, rreth 100 nacionalistë të ekstremit të djathtë marshuan në qendër të Kievit për të festuar 77 vjetorin e divizionit ‘SS Galicia’. Ambasada gjermane në Ukrainë foli publikisht duke dënuar demonstratat.
Antonov vazhdoi duke thënë se problemi nuk kufizohet vetëm në vendet e ish-Bllokut Lindor, duke shtuar se ‘këto tendenca shqetësuese prekin edhe Shtetet e Bashkuara. Nënvlerësimi i kontributit vendimtar të Bashkimit Sovjetik në shkatërrimin e nazizmit dhe përjashtimi i vendit tonë nga fitimtarët në Luftën e Dytë Botërore janë bërë një praktikë e zakonshme’.
Ai vuri në dukje, megjithatë, se shumë amerikanë vazhdojnë të festojnë aleancën midis SHBA-së, Bashkimit Sovjetik dhe kombeve të tjera që mundën Gjermaninë dhe aleatët e saj në Luftën e Dytë Botërore.
