Policia e Shkodrës ka ndaluar dy persona në lidhje me plagosjen e ndodhur dy ditë më parë në këtë qytet. Bëhet fjalë për plagosjen e shtetasit në kërkim Vinçens Piroli, ngjarje e ndodhur më datë 3 Janar.
Lidhur me ngjarjen është ndaluar personi i plagosur i cili aktualisht po merr mjekim në Spitalin e Traumës në Tiranë, me akuzën e ‘moskallëzimit të krimit’.
Në pranga ka përfunduar edhe kushëriri i tij Marjan Marku, i cili e shoqëroi Pirolin në spitalin e Lezhës.
“Në vijim të punës për zbardhjen e ngjarjes së ndodhur më datë 03.01.2022, në Shkodër, ku persona ende të paidentifikuar dyshohen se kanë plagosur me armë zjarri shtetasin V. P., 34 vjeç, i cili është transportuar nga vendi i ngjarjes në spitalin e Lezhës, me automjet, nga shtetasi M. M., specialistët e Seksionit të Hetimit të Krimit të Komisariatit të Policisë Shkodër kanë bërë ndalimin për veprat penale ‘Moskallëzimi i krimit’ dhe ‘Veprime që pengojnë zbulimin e së vërtetës’, të shtetasve:
M.M., 29 vjeç dhe V. P., 34 vjeç, të dy banues në fshatin Zhejë, Kurbin.
Shtetasi M. M., më datë 03.01.2022, rreth orës 19:00, ka transportuar nga lagjja Bahçallëk, Shkodër, në Spitalin Rajonal Lezhë, shtetasin V. P., dhe më pas është larguar, pa njoftuar Policinë.
Shtetasi V. P., i cili aktualisht po merr mjekim në Spitalin e Traumës në Tiranë, nuk ka njoftuar Policinë për ngjarjen dhe ka penguar organet e Policisë për zbardhjen e saj, duke mos deklaruar rrethanat.
Grupi hetimor, nën drejtimin e Prokurorisë së Rrethit Gjyqësor Shkodër, po punon për identifikimin dhe kapjen e autorëve të kësaj ngjarjeje dhe zbardhjen e rrethanave të saj.”- thuhet në njoftimin e Policisë.
