Presidenti i Serbisë, Aleksandar Vucic, ka deklaruar se planifikon të japë dorëheqjen në të ardhmen e afërt dhe se tashmë ka filluar të paketojë librat e tij nga rezidenca presidenciale, shkruan Babel.
.Ai e bëri këtë deklaratë në Radio Beograd.
“Fillova të paketoj librat në Administratën Presidenciale. Kam shumë libra dhe po kërkoj ku t’i vendos,” tha ai.
Vucic tha se zgjedhjet mund të mbahen brenda 3–4 muajve, por jo gjatë verës, jo gjatë sezonit të pushimeve. Megjithatë, ai pranoi se ato mund të mbahen edhe më herët.
Sipas Vucic, ai po shqyrton mundësinë për të kandiduar për postin e kryeministrit.Ai gjithashtu njoftoi se më 27 qershor do mbledhë mbështetësit e tij në një tubim, ku pritet të shpallë planet e tij politike.
Serbia prej muajsh po përballet me protesta të gjera, të cilat nisën pas shembjes së çatisë së një stacioni hekurudhor në Novi Sad, ku humbën jetën 16 persona.
Ngjarja shkaktoi zemërim publik për korrupsionin e dyshuar dhe mungesën e përgjegjësisë.Protestat janë shoqëruar me tensione të larta politike dhe përplasje me autoritetet.Serbia konsiderohet një nga aleatët më të ngushtë të Rusisë në Evropë dhe mban lidhje të forta ekonomike me Moskën.
Që nga fillimi i luftës në Ukrainë, Beogradi ka rezistuar ndaj presionit të BE-së për të vendosur sanksione ndaj Rusisë, ndonëse vendi është kandidat për anëtarësim në Bashkimin Evropian dhe pritet të harmonizojë politikën e jashtme me Brukselin.
