Shkencëtarët izraelitë kanë zbuluar se foshnjat prodhojnë insulinë në zorrët e tyre para lindjes, dhe thonë se kjo do të thotë se të rriturit mund të kenë një sistem ‘rezervë’ që mund të riaktivizohet për të trajtuar diabetin.
Zbulimi u bë në një hulumtim të rishikuar të botuar të enjten në revistën Nature Medicine.
Një ekip i udhëhequr nga Prof. Shalev Itzkovitz i Institutit të Shkencave Weizmann analizoi indet nga fetuset dhe foshnjat e porsalindura, prindërit e të cilëve kishin dhënë leje.
“Për habinë tonë, ne zbuluam se foshnjat e porsalindura kanë një popullatë qelizash që shprehin papritur insulinë dhe këto qeliza nuk janë më aktive në prodhimin e insulinës pas lindjes,” tha Itzkovitz për The Times of Israel.
“Qelizat në fjalë vazhdojnë të ekzistojnë pas lindjes, duke sekretuar hormone të tjera, por ato mbyllin procesin e prodhimit të insulinës.”
Qelizat ishin të tipit të njohur si K/L dhe të vendosura në zorrën e hollë, ku ndodh pjesa më e madhe e përthithjes së lëndëve ushqyese nga ushqimi.
Gjatë gjithë jetës insulina krijohet në pankreas. Diabeti, një çrregullim që prek pothuajse 500 milionë njerëz në mbarë botën, ndodh shpesh kur pankreasi nuk arrin të prodhojë mjaftueshëm insulinë. Itzkovitz tha se identifikimi i një sistemi paralel të prodhimit të insulinës, edhe nëse ai bëhet joaktiv pas lindjes, ofron shpresë.
“Kjo tregon se njerëzit mund të kenë një aparat të fjetur të prodhimit të insulinës që para lindjes dhe se ai potencialisht mund të riaktivizohet sipas nevojës një ditë,” tha Itzkovitz.
