Deputeti Erion Braçe ka reaguar përmes një postimi në rrjetet sociale, pas rrëzimit të amendamenteve të tij për Paketën Fiskale në Kuvend.
Braçe shprehet se propozimet e tij që janë refuzuar janë në dëm të bujkut.
“Sot në #kuvend;
Llogaria e #tvsh është një, kjo, dhe në dëm të bujkut!
Llogaria e taksës kombëtare është një, kjo, dhe përsëri në dëm të bujkut!
Propozimi im që në fakt është propozimi i bujqve në Myzeqe, kthen llogarinë në të mirë të bujkut, grumbulluesit e përpunuesit; drejtpërdrejt në faturë, në llogarinë e bujkut dhe prej qeverisë;
Barazon skemën e tvsh dhe bën grumbulluesin ekonomikisht të interesuar për prodhimet e bujkut!”– shkruan Braçe, ndërsa publikon edhe një video nga fjalimi i tij sot në Kuvend.
Pas shumë debatesh dhe diskutimesh, pak më herët në Kuvend u miratua buxheti për vitin 2022. Amendamentet e propozuara nga ish-zv.kryeministri Erion Braçe dhe nga të tjerë deputetë të PD-së dhe LSI-së u rrëzuan të gjitha, duke u pranuar vetëm propozimi i Taulant Ballës për shtimin e fondit prej 60 milionë lekësh për KPA-në.
Ky buxhet ka pasur kundërshti të mëdha, veçanërisht nga fermerët të cilët kanë dalë vazhdimisht në protesta, edhe sot përpara Kuvendit.