Policia e Fierit ka finalizuar operacionin policor të koduar “Hamili”, duke goditur 2 raste, një për prodhim dhe shitje të narkotikëve dhe një për kultivim të bimëve narkotike.
Mësohet se një sasi prej 60.4 kg kanabis është gjetur dhe sekuestruar në një stallë në fshatin Hamil të Fierit, ku janë arrestuar 7 persona dhe ka nisur edhe një procedim penal për kryeplakun e këtij fshati.
Sipas uniformave blu, 7 personat ndodheshin në një stallë në pronësi të shtetasit me iniciale A.H. dhe “po punonin në procesin e tharjes së bimës narkotike”.
Ndërkohë, nga kontrollet e ushtruara përgjatë territorit të këtij fshati, është konstatuar gjithashtu një tokë e mbjellë me bimë narkotike në pronësi të një 39-vjeçari me inicialet E. H., i cili është vënë nën hetim.
Njoftimi i Policisë:
Finalizohet një tjetër operacion për goditjen e veprimtarisë kriminale në fushën e narkotikëve.
Operacioni policor i koduar “Hamili”, i zhvilluar nga Seksioni për Hetimin e Narkotikëve dhe Njësia Operacionale në DVP Fier në bashkëpunim me Komisariatin e Policisë Fier.
Gjatë operacionit goditen 2 raste, një për prodhim dhe shitje të narkotikëve dhe një për kultivim të bimëve narkotike. Sekuestrohet rreth 60 kg lëndë narkotike cannabis sativa. Vihen në pranga 7 shtetas, procedohet penalisht kryeplaku i fshatit Hamil.
Specialistët e Seksionit për Hetimin e Narkotikëve dhe Njësia Operacionale në DVP Fier, në bashkëpunim me Komisariatin e Policisë Fier, në vijim të punës për goditjen e aktivitetit kriminal në fushën e prodhimit dhe shpërndarjes së lëndëve narkotike, bazuar në informacionet e siguruara në rrugë policore, bënë të mundur finalizimin me sukses të operacionit policor të koduar “Hamili”.
Gjatë kontrollit të ushtruar në fshatin Hamil, në stallën në pronësi të shtetasit A. H., janë gjetur dhe sekuestruar 60.4 kg lëndë bimore cannabis sativa si edhe në tokën e tij të mbjellë me misër u gjetën të kultivuara bimë cannabis sativa.
Në vijim të veprimeve, u arrestua në flagrancë për veprën penale “Prodhimi dhe shitja e narkotikëve” e kryer në bashkëpunim dhe “Kultivimi i bimëve narkotike” shtetasi A. H., 42 vjeç, banues në Hamil, si edhe u arrestuan për veprën penale “Prodhimi dhe shitja e narkotikëve” e kryer në bashkëpunim shtetasit Z. K., 36 vjeç, A. K., 24 vjeçe, F. K., 38 vjeçe, H. K., 60 vjeçe dhe F. K., 34 vjeçe, banues në fshatin Baltëz, të cilët u gjetën në stallën e shtetasit A. H., duke kryer procesin e tharjes së bimëve narkotike.
Gjithashtu u procedua penalisht për veprën penale “Moskallëzimi i krimit”, kryeplaku i fshatit Hamil, shtetasi S. H., 56 vjeç.
Gjatë kontrollit të territorit, po në këtë fshat, në tokën e mbjellë me misër të shtetasit E. H., 39 vjeç, u gjetën të kultivuara bimë narkotike cannabis sativa.
Në përfundim të veprimeve, u arrestua në flagrancë shtetasi E. H., 39 vjeç, për veprën penale “Kultivimi i bimëve narkotike”.
Materialet proceduriale i kaluan Prokurorisë pranë Gjykatës së Shkallës së parë Fier për veprime të mëtejshme.
