Emiratet e Bashkuara Arabe goditën dhjetëra objektiva brenda Iranit gjatë luftës, në koordinim me Shtetet e Bashkuara dhe Izraelin, raportoi të premten Wall Street Journal, duke cituar persona të njohur me çështjen.
Sipas raportit, Emiratet filluan sulmet ndaj objektivave në Iran në fillim të luftës dhe i vazhduan deri një ditë pas shpalljes së armëpushimit. Gazeta thotë se roli i Emirateve ishte më i thellë nga sa ishte raportuar më parë në fushatën e udhëhequr nga SHBA dhe Izraeli kundër Iranit.
Sulmet thuhet se kishin në shënjestër objekte në ishujt Qeshm dhe Abu Musa në Ngushticën e Hormuzit, rafinerinë e naftës në ishullin Lavan në Gjirin Persik dhe kompleksin petrokimik në Asaluyeh. Sulmi në Asaluyeh u krye së bashku me Izraelin, sipas raportit, dhe shkaktoi kritika ndërkombëtare që çuan Uashingtonin t’i kërkonte Izraelit të mos kryente sulme të mëtejshme ndaj objekteve energjetike.
Disa nga sulmet e Emirateve kishin në shënjestër infrastrukturën energjetike iraniane si përgjigje ndaj sulmeve të Teheranit ndaj infrastrukturës së naftës dhe gazit të Emirateve, raporton gazeta. Gjatë luftës, Irani lëshoi më shumë se 2,800 raketa dhe dronë drejt Emirateve, më shumë se ndaj çdo vendi tjetër.
Sipas raportit, përfshirja e Emirateve tregon gatishmërinë e Abu Dhabit për të mbrojtur interesat e tij strategjike, në kontrast me shtetet e tjera të Gjirit që mbajtën një qëndrim më të kujdesshëm ndaj Iranit.
Po ashtu, sipas Wall Street Journal, Arabia Saudite i është ankuar Shteteve të Bashkuara në fillim të prillit, disa ditë para armëpushimit, se sulmet e Emirateve po rrisnin rrezikun e goditjeve ndaj infrastrukturës energjetike në rajon. Riadi ka kërkuar që Uashingtoni të ushtrojë presion mbi Abu Dhabin për të ndalur sulmet dhe për t’u bashkuar me përpjekjet diplomatike rajonale.
Zyrtarë të Gjirit i thanë gazetës se presidenti i Emirateve, Mohammed bin Zayed, ka shprehur pakënaqësi ndaj princit të kurorës saudite Mohammed bin Salman për refuzimin e këtij të fundit për të marrë pjesë në veprime të koordinuara ushtarake kundër Iranit.
Duke reaguar ndaj raportit, Ministria e Jashtme e Emirateve tha se Irani mban përgjegjësinë e plotë për sulmet dhe pasojat e tyre.
Raporti vjen pas pretendimeve të mëparshme se Emiratet kanë kryer sulme brenda Iranit, përfshirë një ndaj rafinerisë së Lavanit, që dyshohet se shkaktoi zjarr të madh dhe ndërpreu pjesërisht prodhimin e saj, shkruan Ynet.
