Vendosni fjalën kyçe....

Ndalohet 18-vjecari në Shkodër, ishte në kërkim për vjedhjen e një dyqani


Është ndaluar 18-vjeçari që dyshohet se vodhi një shumë lekësh në një dyqan në Drisht.

Sipas policisë, në pranga ka rënë adoleshenti me iniciale A.C., banues në fshatin Bardhaj ndërsa në kërkim është shpallur bashkëpunëtori i tij, D.Sh.

Ata akuzohen se kanë kërcënuar me armë pronaren e dyqanit të fshatit duke i marrë me forcë një shumë lekësh.

Njoftimi

“Shkodër/Vijon puna për kapjen e personave të shpallur në kërkim për vepra të ndryshme penale. Vihet në pranga 18 vjeçari i dyshuar si autor i vjedhjes me armë të një shume parash në një dyqan në fshatin “Drisht”.

Në vijim të punës për zbardhjen e vjedhjeve të ndodhura më parë, identifikimin dhe kapjen e autorëve, Specialistët për Hetimin e Krimeve në Komisariatin e Policisë Shkodër në bashkëpunim me Prokurorinë e Rrethit Gjyqësor Shkodër, falë veprimeve profesionale, bënë të mundur zbardhjen e ngjarjes së ndodhur më datë 02.04.2021, në fshatin “Drisht”, ku nën kërcenimin e armës dy shtetas kishin vjedhur një shumë parash.

Si rezultat i veprimeve të kryera u bë e mundur, identifikimi, kapja dhe ndalimi i njërit prej autorëve, A. C., 18 vjeç, banues në fshatin Bardhaj, Shkodër. Ky shtetas dyshohet se paraditen e datës 2 prill 2021 në fshatin Drishtë, në bashkëpunim me shtetasin D. Sh., kanë vjedhur nën kërcënimin e armës në dyqanin e shtetases Y. C., një shumë parash.

Shtetasi D.Sh., është shpallur në kërkim dhe vijon puna për kapjen e tij. Materialet iu referuan Prokurorisë Pranë Gjykatës së Shkallës së Parë Shkodër për veprime të mëtejshme.”