Qindra mijëra njerëz janë evakuuar nga zonat bregdetare të qytetit kinez të Shangait, ndërsa tajfuni In-Fa po godet bregdetin në jug të tij. Të gjitha fluturimet për në qytet dhe shërbimet e trenave me shpejtësi të lartë janë pezulluar.
Shangai lëshoi paralajmërimin e tajfunit të nivelit të dytë ndërsa In-Fa pritet të godasë rrethin jugor të qytetit në Pudong të dielën. Një video e postuar në mediat sociale tregon qiellin mbi qytet të errësuar nga re të zeza të stuhisë që vërtiten mbi rrokaqiejt e Shangait.
Rreth 330,000 njerëz u evakuuan nga zonat bregdetare të qytetit, përfshirë rrethin Fengxian. Mbi 100,000 nëpunës civilë dhe punëtorë u vendosën në rrugët e qytetit si pjesë e masave masive për parandalimin e përmbytjeve. Kina është goditur prej ditësh nga reshje të dendura shiu e përmbytje që kanë shkaktuar dhjetëra viktima.
