Kirurgu i përgjithshëm Dr.Myftar Torba ka pranuar hapur marrjen e parave nga pacientët në spitalet publike në Shqipëri.
Një fenom i cili jo se nuk është i ditur por e pranuar hapur nga mjekët në media është e rrallë të thuhet.
Kirurgu madje në deklaratën e tij shkoi më tej duke thënë se nëse nuk merren bakshishe mjekët do largoheshin nga vendi i punës.
“Unë të siguroj, nëse nesër në mëngjes, pacientët nuk do të jepnin më asnjë lloj dhurate/ bakshishi, që në njëfarë mënyre e kompeson rrogën, nuk do të ngelte asnjë mjek. Asnjë orë, as mjek nuk do të kishe në spital”-deklaroi Torba në emisionin Top Talk.
Megjithatë, thekson se ryshfeti dhe kërkesa e mjekëve për të marrë lekë para se të japin shërbimin, janë dy gjëra të ndryshme.
“Për mua dhe kolegët e mi, çdo pacient e ka marrë dhe e merr shërbimin shëndetësor, pavarësisht mundësisë për të paguar. Është kriminale nëse doktorët i venë kusht. T’i thuash tjetrit dua kaq lekë për të bërë operacionin, është kriminale, duhet të hetohet. Në 90% të rasteve, pacientët japin bakshish është vetëm një pjesë shumë e vogël, që është skandaloze dhe duhet të hetohet nëse shërbimi jepet në këmbim të pagesës”.
Sipas tij, duhet legjitimuar bakshishi.
“E rëndësishme është që ekipi të marrë të ardhura, aq sa merr sot, që të mbajë ekipin në punë. Mënyrën se si ta gjejë qeveria. Opsioni më i lehtë dhe më i ndershëm, është që çdo para që jepen në dorë, të lihen në recepsion me faturë dhe këto para të shkojnë te puna e gjithsecilit”.
