Vendosni fjalën kyçe....

Qerim Ismailaj e mban mandatin pavarësisht dënimit në Greqi, KQZ rrëzon kërkesën e PD-së


KQZ ka vendosur të lërë në detyrë kreun e Bashkisë së Mallkastrës, Qerim Ismailajn, duke rrëzuar kështu kërkesën e PD-së për shkarkimin e tij, për shkak të dënimit në mungesë me 3 vite burg në Greqi.

Lajmin e bëri të ditur kreu i KQZ-së, Ilirjan Celibashi. Ai tha se për një rast dënimi jashtë vendit, KQZ nuk ka kompetencë të vlerësojë nëse kualifikohet si vepër penale dhe për këtë lexon vendimin e prokurorisë, sipas së cilës, Ismailaj në Shqipëri do të ishte dënuar me gjobë për “rrahjen”, kështu që kjo nuk e çon atë në kushtet e ndalimit.

“Në rastin kur vendimet penale janë kryer nga autoritetet përkatëse gjyqësore brenda territorit të Shqipërisë, KQZ bën vetë vlerësimin nëse subjekti është apo jo në kushtet e ndalimit dhe konkludon, kur është dhënë nga një autoritet i huaj, KQZ nuk e ka mundësinë që ta bëjë këtë vlerësim sepse KQZ nuk ka as kapacitetin dhe as kompetencën për të vlerësuar nëse një vepër penale e kryer në një territor të huaj, kualifikohet si një nga veprat penale që ai do ishte në kushtet e ndalimit.

Këtë kërkesë ja bëmë prokurorisë dhe ata na thonë nëse vepra penale dhe çdo element tjetër sa dhe si qëndron në ato që ka parashikuar neni 2, në këtë rast leximi i ligjit për dekriminalizmin dhe konstatimi i rasteve të përjashtimit, nga ana e KQZ, bëhet me ‘syzet’ e zyrës së prokurorisë, ai na thotë se çfarë vepre penale ka kryer dhe ne shikojmë nëse është apo jo që e vendos në kushtet ndalimit një subjekt.

Ne në rastin e lehtësimit të opinionit të zyrës së Prokurorit ët Përgjithshëm, është njësoj sikurse do të lexonim vendimin e një autoriteti gjyqësor shqiptar dhe ky lexim na thotë që subjekti i verifikimit, ka kryer veprën penale të rrahjes dhe kjo është dënuar, ose duhej të ishte dënuar me gjobë, në këtë rast, në kushtet e këtij leximi, ky subjekt nuk do të ishte në kushtet e ndalimit. Ismailaj nuk përfshihet në kushtet e ndalimit, mban mandatin.”- tha Celibashi.