Vendosni fjalën kyçe....

Basha me gratë sipërmarrëse në Elbasan: Plani ynë ekonomik edhe për gruan, bizneset me 140 milion lekë xhiro, nuk taksohen mbi 0,5% të xhiros


Kryetari i Partisë Demokratike, Lulzim Basha, ka zhvilluar sot një takim me gra sipërmarrëse në qytetin e Elbasanit, ku ka bashkëbiseduar për klimën e sipërmarrjes dhe vështirësitë e mbijetesës së biznesit.

Pasi dëgjoi shqetësimet e tyre, Basha tha se me planin e Partisë Demokratike për biznesin, do fitonin dhe gratë sipërmarrëse.

Basha tha se plani i tij i cili parashikon që çdo biznes me xhiron nën 140 milion lekë të vjetra në muaj, nuk do të paguajë asnjë shumë mbi 0.5% të xhiros vjetore në vit, uljen e çmimit të energjisë elektrike dhe të naftës. Ai gjithashtu tha se një vendim tjetër i qeverisë së ardhshme do të jetë anulimi i procesit të fiskalizimit, që sipas kreut të opozitës është një proces korruptiv.

“Janë dy gjëra që janë të lidhura me njëra-tjetrën. Plani ynë për ekonominë dhe plani ynë për gruan në shoqëri. Pse kemi një plan të veçantë për gruan? Me të vërtetë është gjysma e shoqërisë, por merr më pak përkrahje se sa merr gjysma tjetër e shoqërisë.

Edhe sikur ta ç’veshim këtë pra, përditshmëria siç e preku Flutura, sa e vështirë është për një grua të çajë përpara në krahasim me një burrë si sipërmarrëse, por jo vetëm, në çdo fushë tjetër… çdokush e kupton, nëse ke gjysmën e shoqërisë me dyfishin e ngarkesës dhe gjysmën e përkrahjes, krahasuar me gjysmën tjetër, atëhere ke një defekt të madh me ingranazhin që e çon shoqërinë përpara.

Dhe kjo në fakt bën edhe dallimin midis shoqërive që ecin përpara dhe shoqëritë që mbesin në vend, siç ka mbetur Shqipëria këto tetë vite.

Prandaj dy janë fushat kryesore që besoj se do t’i vijnë në ndihmë Shqipërisë, shoqërisë, duke I ardhur në ndihmë veçanërisht gruas shqiptare. Me të vërtetë nuk prek vetëm gratë sipërmarrëse, prek edhe burrat sipërmarrës, por prek në tërësi gjithë mekanizmin ekonomik.

Dy propozimet që ne i bëmë dhe bëmë betejë: Propozimi i parë që të hiqej taksa për biznesin e vogël gjoja u adaptua pas disa vitesh, por ju e dini të gjithë se kjo është fiktive.

Sepse me të vërtetë nga njëra anë u hoq taksa për biznesin e vogël siç propozuam ne, por nga ana tjetër u shtuan tarifat vendore për shërbimet të cilat biznesi i vogël nuk i merr, u shtua çmimi i karburantit, u shtua çmimi i energjisë dhe mbi të gjitha u shtuan gjobat.

Gjobat që paguan biznesi i vogël, me një gjobë të merr 2-fish apo 3-fish se çtë merrte përpara me taksimin që gjoja hoqi.

Zgjidhja për këtë është fare e thjeshtë.

Nëse ne nuk shëndoshim shtyllën kurrizore të ekonomisë që është biznesi i vogël dhe i mesëm që përbën 98.5% të ekonomisë ndërkombëtare, atëherë ekonomia kurrë nuk ngrihet në këmbë, kurrë nuk mund të ecë përpara. Ndaj dhe platforma për biznesin e vogël është më favorizuesja në rajon. Tavani prej 0.5% të xhiros totale vjetore për taksat dhe tarifat vendore. Nëse i ke më të ulëta dhe natyrisht ne do ta nxisim pushtetin vendor t’i ulë dhe më shumë, akoma më mirë, por 0.5.

Asnjë biznes me xhiron nën 140 milion lekë të vjetra në muaj nuk do të paguajë asnjë shumë mbi 0.5 % të xhiros vjetore në vit. Dhe kjo bëhet me qëllim që shtylla kurrizore, biznesi i vogël ta rimarrë veten dhe në këtë mënyrë të ndihmojë gjithë strukturën ekonomike shqiptare. E dyta është çmimi i naftës apo karburantit, naftë, benzinë dhe çmimi i energjisë elektrike. Edhe këtu ne thyejmë rekorde. Ulja e tyre do të garantojë që ju, jo vetëm të mbijetoni po të rinisni ciklin e prodhimit, të tregtimit, të shërbimeve dhe të krijimit të fitimit në vend të zhytjes në borxhe dhe falimentimit. Një pullë e vendosur në vitrinë, në dritare, në hyrje të biznesit të vogël, do t’ia bëjë të pamundur çdo lloj inspektori të shtetit, të futet brenda dhe të terrorizojë dhe të marrë nëpër këmbë sipërmarrësit, t’i trajtojë si të jenë skllevër të shtetit kur në fakt janë ata që mbajnë shtetin, mbajnë dhe shoqërinë, mbajnë dhe ekonominë. Këto pra, do të jenë hapa që menjëherë do t’i vijnë në ndihmë sipërmarrjes në tërësi. Bëjmë me pjesën tjetër të rëndësishme të rolit të gruas që është familja, janë fëmijët dhe nëse shteti është indiferent ndaj sfidave me të cilat përballet gruaja shqiptare për të rritur fëmijët, atëherë s’e ka bërë shteti detyrën e vet. Ndaj, platforma jonë për t’ju ardhur në ndihmë çifteve të reja me subvencione për interesat e kredive për banesat, me bonusin prej 30 mijë leke të vjetra për çdo fëmijë të porsa lindur deri në 5 vjeç, me tekstet falas dhe zgjatjen e orarit mësimor për t’ju ardhur në ndihmë si grave të punësuara ashtu dhe sipërmarrëse. Dhe me garantimin  që çdo i ri dhe e re shqiptare që dëshiron të shkojë në Universitet të mos pengohet nga pamundësia e familjes për të paguar tarifat universitare ne besojmë fuqimisht që ndihmojmë familjen në tërësi dhe gruan në veçanti që ka barrën më të rëndë brenda familjes për të menaxhuar apo mirëmenaxhuar edhe në një situatë normale e jo më në këtë situatë të vështirë ku ndodhet Shqipëria sot.

Evazioni fiskal ka arritur kulmin, s’ka raport që nuk e përmend. Pse? Se i rrisin taksat, i trajtojnë 5 biznese si të nënës e 95 si të njerkës dhe pastaj ndërrojnë çdo dy vjet procedurat e fiskalizimit, kasat, e të tjerë, e të tjerë. Prandaj ju garantoj që ky proces të cilin ne e konsiderojmë korruptiv, do të ndalet dhe ju nuk do të paguani. Ata që kanë paguar do të rimbursohen sepse njësoj si gjobat e tjera që ka marr shteti shqiptar për shkak të papërgjegjshmërisë dhe klientelizmit të këtij kryeministri. Fiskalizim i themi ne tani, po është një proces thellësisht korruptiv do të ndalen dhe përgjegjësit do të vihen para ligjit” – deklaroi Basha.