Shelfet e akullit janë kritike për të mbajtur të ekuilibruar peizazhin tipik të Antarktidës, pasi ato parandalojnë që uji të rrjedhë me shumicë në oqeane, gjë që do të bënte që nivelet globale të detit të rriteshin shumë.
Mundësitë janë që mbi një e treta (67 përqind) e shelfit të akullit të Antarktidës do të shembet në det nëse temperaturat globale tejkalojnë nivelet para-industriale me 4 gradë Celsius, paralajmëron një studim i ri nga Universiteti i Reading në Britaninë e Madhe. Gjetjet janë botuar në revistën ‘Geophysical Research Letters’.
Në të, shkencëtarët shpjegojnë sesi shelfet e akullit – platformat e akullit që notojnë pranë vijës bregdetare – veprojnë si një digë, duke ngadalësuar ritmin e shkrirjes së akullit dhe ujin që derdhet në mënyrë të pakontrolluar.
“Shelfet e akullit janë mbrojtës të rëndësishëm që parandalojnë akullnajat në tokë të rrjedhin lirshëm në oqean dhe të ndikojnë në ngritjen e nivelit të detit. Kur ato shemben, është si një tapë gjigande që hiqet nga një shishe, duke lejuar që sasi të paimagjinueshme të ujit nga akullnajat të derdhen në det “, shpjegoi autorja kryesore e studimit, Ella Gilbert, një shkencëtare e klimës në Departamentin e Meteorologjisë në Universitetin e Reading.
Gjatë verës, akulli sipërfaqësor në shelfe shkrihet, duke u zhytur në boshllëqe më të vogla në dëborë poshtë, ku zakonisht ngrin përsëri.
Megjithatë, në rast të shkrirjes në shkallë më të madhe dhe reshjeve të pakta të borës, ky ujë grumbullohet në sipërfaqen e akullit ose derdhet në çarje, duke i zmadhuar ato dhe duke shkaktuar ndarjen e shelfit dhe rrëshqitjen në det.
