Sulmohet me gurë një autobus me turistë kosovarë në afërsi të urës së Limit, në Berane të Malit të Zi.
Ngjarja ka ndodhur mbrëmjen e së mërkurës që shënoi dhe 13-vjetorin e pavarësisë së Kosovës, dhe shoferi i autobusit e ka denoncuar rastin në policinë e Rozhajës.
Nuk ka raportime për të lënduar, ndërsa policia malazeze e mohon që ky të ketë qenë një sulm i organizuar.
“Gjithçka është një incident sporadik. Një gur, një dritare. Asgjë e organizuar.”– tha policia malazeze.
Semir Kardovic, i cili është konsulent në një Agjenci Turistike në Rozhajë, thotë në një postim në Facebook se ngjarja e sotme ia kujton vitet ‘90-të, ndërsa bën të ditur se policia malazeze ishte vetëm 200 metra larg vendit të ngjarjes.
Kardoviç thotë se kjo nuk është hera e parë kur janë sulmuar autobusët me turistë kosovarë që shkojnë atje për skijim.
“Absurdi më i madh në tërë këtë rrëfim është se patrulla e policisë në Berane ishte vetëm 200 metra larg vendit të ngjarjes. Dhe kur organizatorët e udhëtimit kanë shkuar ta paraqesin rastin, ata u kanë thënë se mund të vazhdojmë rrugën sepse asgjë nuk mund t’u ndihmojnë.”- shkruan Kardovic.
