Eurodeputeti Michael Gahler, i cili është Koordinator për Politikën e Jashtme dhe Zgjerimin në Parlamentin Europian, ka ngritur kritika ndaj qeverisë shqiptare lidhur me qëndrimin e saj ndaj Bashkimit Europian.
Pasi përmend kushtet e papërmbushura për hapjen e negociatave në një postim në Facebook, Gahler thotë se qeveria shqiptare nuk duhet të provokojë e as të përgojojë BE-në e të mohojë kushtet, por që t’i plotësojë ato.
KOMENTI I GAHLER
Për ata miq të FB-së që interesohen për zhvillimet në Shqipëri:
Kur bëhet fjalë për detyrimet që Shqipëria duhet të kryejë para fillimit të negociatave të pranimit, miqtë e një Shqipërie Europiane, nuk duhet të frustrohen shumë dhe për shumë kohë nga ata që kanë për detyrë t’i përmbushin! Dmth nga qeveria!
Konkluzionet e Këshillit Europian janë të ditura, rekomandimet e Komisionit të Venecias janë të ditura, teksti dhe fryma e marrëveshjes së 5 qershorit është e ditur!
Kjo e fundit është shkelur, ndërkohë që nuk ka progres në shumë kushte:
-Ligji për median nuk është përmirësuar;
-zyrtarë të përfshirë në manipulimin e votave i kanë shpëtuar ndjekjes penale;
-gjithashtu zyrtarë të lartë të qeverisë e ish-magjistratë të gjyqësorit të përfshirë në korrupsion i kanë shpëtuar ndjekjes penale;
-pastrimi i parave mbetet një shqetësim i paadresuar, nisur edhe nga skandali i fundit;
-kushtetueshmëria e zgjedhjeve lokale të vitit 2019 ende nuk është sqaruar;
-ngritja e institucioneve të reja të gjyqësorit është e ngadaltë;
Qeveria në Tiranë nuk duhet të provokojë miqtë e Shqipërisë europiane, qoftë duke mohuar këto kushte apo duke përgojuar BE-në për ndihmën e saj ose duke bërë marrëveshje me palë të treta në shkelje të ligjit europian.
Këto janë çështjet që kam ngritur në forume europiane e do të vazhdoj të ngre për hir të besueshmërisë së vendit dhe të ecurisë së shpejtë drejt anëtarësimit.
