Vendosni fjalën kyçe....

Vjedhja e “turpshme”, hajdutët grabisin ngarkesën dhe pajisjet e avionit tejet sekret të Rusisë


Policia në Rusinë jugore po heton, pasi ngarkesa e një avioni tejet sekret Ilyushin Il-80 dhe pajisjet elektronike, thuhet se janë vjedhur. Përmbajtja e avionit është klasifikuar.

Il-80, i cili po i nënshtrohej mirëmbajtjes në qytetin Taganrog dhe është një nga avionët ushtarakë më misteriozë të Rusisë, i njohur për aftësinë e tij për t’i mbijetuar një sulmi bërthamor.

Zhvilluar gjatë periudhës sovjetike, ai u ndërtua në rast se udhëheqja e lartë e vendit kishte nevojë të evakuohej nga ajri. Natyra e tij e ndjeshme do të thotë që askush nuk e di se çfarë ka në aeroplan – përveç, ndoshta hajdutëve që arritën të hipnin në bord.

Sipas një burimi të cituar nga agjencia e lajmeve Interfax, aeroplanit u grabitën 39 njësi të pajisjeve elektronike dhe pesë borde të stacioneve të radios në fund të javës së kaluar.

Pretendimi u mbështet gjithashtu nga kanali televiziv REN, i cili zbuloi se oficerët e zbatimit të ligjit gjetën gjurmët e gishtave në kutinë e ngarkesës dhe gjurmët e këpucëve të hajdutëve të dyshuar.

Aeroplani po i nënshtrohej mirëmbajtjes rutinë në objekt, 1000 kilometra në jug të Moskës.

Il-80 e bëri fluturimin e parë në vitin 1985 dhe hyri në veprim të plotë në 1992. Në kohë nevoje, avioni mund të funksionojë si një post komandues fluturues edhe nëse strukturat tokësore janë shkatërruar, dhe është projektuar për mbrojtje nga armët të shkatërrimit në masë, duke përfshirë bomba bërthamore.