Qeveria franceze ka kërcënuar të mbyllë dhjetëra xhami që janë shënuar si kërcënime të mundshme të sigurisë.
Masat janë pjesë e një fushate agresive për të goditur ekstremizmin islamik në vend. Ministri i Brendshëm, Gerald Darmanin, tha të enjten se autoritetet kishin në shënjestër 76 xhami të dyshuara për promovimin e ‘separatizmit’.
Në një intervistë për radion RTL, ai pohoi se në ‘disa zona të përqendruara’ të vendit, xhamitë janë qartësisht kundër vlerave republikane.
Ai tha se shërbimet e inteligjencës së Francës kanë ‘ndjekur’ hoxhallarë që predikojnë ide ‘në kundërshtim me vlerat tona’.
Darmanin theksoi, megjithatë, se institucionet që janë identifikuar si rreziqe të mundshme janë vetëm një pjesë e më shumë se 2,600 vendeve të adhurimit mysliman në Francë.
“Në ditët në vijim, do të kryhen kontrolle në këto vendet e adhurimit. Nëse ndonjëherë këto dyshime konfirmohen, unë do të kërkoj mbylljen e tyre.” – shkroi ai në një postim në ‘Twitter’ duke komentuar intervistën.
