Kryeministri Edi Rama, ka publikuar sot një video si përgjigje ndaj kryedemokratit Lulzim Basha, i cili tha se mjekët e Komitetit Teknik janë fasadë e Ramës.
Në videon e publikuar nga kryeministri, jepet me detaje jetëshkrimi i secilit prej ekspertëve të Komitetit Teknik që po punon në luftën kundër pandemisë.
Flitet për shkollimin e tyre brenda e jashtë vendit, si dhe punët ë kanë bërë në shërbim të komunitetit.
“Kush janë ekspertët e Komitetit Teknik që përcaktojnë strategjinë e gjurmimit të Covid19 dhe udhëzojnë qeverinë në çdo hap për masat e nevojshme kundër Armikut të Padukshëm”, shkruan Rama krahas videos.
Duket ky një standard i dyfishtë që kryeministri përdor ndaj mjekëve, pasi vetëm dy ditë më parë e diskreditoi një punonjës të mjekësisë në spitalin e Durrësit, duke i publikuar dëftesën e gjimnazit dhe duke thënë se nuk është madje as mjek pasi ka bërë vetëm një kurs infermierie pas gjimnazit bujqësor.
Kryeministri duket se e ka ngatërruar detyrën e tij me rolin e mësuesit që bën vlerësimin për nxënësit e tij, saqë tani merret duke bërë vlerësimet për bluzat e bardha.
