16 punëtorë në Kinën Jugperëndimore u vranë pasi u bllokuan nën tokë në një minierë qymyri dhe u ekspozuan ndaj niveleve të larta të monoksidit të karbonit, njoftoi media shtetërore kineze.
Kishte 17 persona brenda minierës së qymyrit Songzao në qytetin kinez të Chongqing në kohën e incidentit, sipas medias shtetërore CGTN. Vetëm një person u nxor i gjallë nga ekipet e shpëtimit dhe ai është në gjendje kritike në spital, njoftoi CGTN.
Aksidenti ndodhi menjëherë pas mesditës me kohën lokale të dielën, kur një linjë transportuese në minierë mori flakë, duke prodhuar nivele të larta të monoksidit të karbonit dhe duke bllokuar minatorët.
Agjencia shtetërore e lajmeve Xinhua raportoi se nivelet e monoksidit të karbonit brenda minierës së qymyrit kishin tejkaluar kufijtë e sigurt.
Ministria e Menaxhimit të Emergjencave të Kinës tha në një deklaratë se po punon për të identifikuar shkakun e aksidentit.
