Një 25-vjeçar është arrestuar ditën e sotme lidhur me mbytjen e një vajaze 17-vjeçare ditën e djeshme në plazhin e Velipojës.
Në pranga ka rënë i riu Indrit Bajraktari nga Postriba i cili kishte ardhur me pushime nga Anglia. Sipas policisë, i riu kishte dalë për shëtitje me motor uji bashkë me vajzën ndërsa ka dalë në breg me not duke e lënë atë të mbytur.
17-vjeçarja u gjet e mbytur nga peshkatarët në një largësi rreth 800 metra larg bregut nga peshkatarët e zonës ndërsa mbetet ende e paqartë dinamika e ngjarjes.
Pas daljes nga deti me not, Bajraktari u ka thënë pronarëve të motorit të ujit të marrë me qira se vajzën e kishte lënë në breg dhe e kishte marrë xhaxhai i saj.
Ai është shoqëruar dhe po merret ne pyetje ndërsa autoritetet pritet të nxjerrin autopsinë mbi shkaqet e vdekjes së 17-vjeçare me banim në Tiranë.
Njoftimi
Vihet në pranga një 25-vjeçar për ngjarjen e ndodhur në Velipojë ku humbi jetën si pasojë e mbytjes në det një 17-vjeçare.
Strukturat hetimore të Drejtorisë Vendore të Policisë Shkodër në bashkëpunim me Shërbimet e Policisë Velipojë, menjëherë pas ngjarjes së ndodhur ku humbi jetën si pasojë e mbytjes në det një 17-vjeçare, organizuan punë nën drejtimin e Prokurorisë së Rrethit Gjyqësor Shodër për zbardhjen e rrethanave të ngjarjes.
Në përfundim të veprimeve të para hetimore u bë arrestimi në flagrancë i shtetasit:
– I. B., 25 vjeç, banues në fshatin Kullaj, Njesia Administrative Postrribë Shkodër.
Nga tërësia e veprimeve hetimore rezultoi se më datën 19.08.2020, rreth orës 14:00, në vendin e quajtur Vilu, plazh Velipojë Shkodër, ky shtetas ka hyrë në det me motorr uji të marrë me qera së bashku me shtetasen E. D., 17 vjeçe, banuese në Bathore.
Rreth orës 16:30, ky shtetas ka dalë në breg pa motorrin e ujit duke lënë të mbytur në ujë shtetasen E. D., e cila kishte ardhur për pushime së bashku me familjen e saj.
Në cilësinë e provës materiale u sekuestrua çelësi i motorrit.
Materialet i kaluan Prokurorisë pranë Gjykatës së Shkallë së Parë Shkodër për veprime të mëtejshme për veprat penale “Shkaktimi i vetëvrasjes”, “Moskallëzimi i krimit” dhe “Veprime që pengojnë zbulimin e së vërtetës”.
