Vendosni fjalën kyçe....

Sekuestrohen 1.2 milion litra naftë e një magazinë, në pronësi të Lulzim Berishës


Policia ka sekuestruar 1.2 milion litra naftë dhe një magazinë doganore në Durrës.

Sekuestrimi është bërë në kuadër të Operacionit Forca e Ligjit ndërsa mësohet se nafta e magazina ishin në pronësi të Lulzim Berishës, i liruar nga burgu pak kohë më parë.

Në njoftimin zyrtar thuhet se pavarësisht faktit që subjetit i ishte hequr licenca për furnizimin e anijeve me naftë, ai e vijonte atë në mënyrë të paligjshme duke përdorur shantazh ndaj konkurrentëve e duke provuar të krijojë monopol kërcënues për opertatorët e industrisë së peshkimit.

Njoftimi

“Në kuadër të operacionit “Forca e Ligjit”, përgjatë dy muajve të fundit, OFL nuk e ka ndërprerë punën asnjë ditë. Në bashkëpunim me agjencitë e tjera ligjzbatuese, OFL ka vijuar hetimet dhe goditjen e subjekteve të Ligjit Special.

Së bashku me Strukturat e Specializuara të Hetimit Financiar në Policinë e Shtetit dhe Doganat, në vijim të luftës kundër informalitetit, evazionit, ushtrimit të aktiviteteve të palicencuara dhe abuzimeve me tregun e hidrokarbureve, mbrëmjen e djeshme OFL sekuestroi 1,2 milion litra naftë dhe një magazinë doganore, në Durrës, në pronësi të subjektit privat L. B. & E. SH.

Këtij subjekti, më datë 13.02.2019, me vendimin nr. 85, i ishte revokuar licenca nga autoritetet kompetente shtetërore “Për ushtrimin e veprimtarisë së furnizimit me karburant, për konsum të anijeve në porte”. Pavarësisht revokimit të licencës, subjekti ka vazhduar të ushtrojë në mënyrë të paligjshme aktivitetin e tregtimit të naftës për peshkimin, duke përdorur shantazhin ndaj konkurrencës dhe duke tentuar të krijojë një monopol kërcënues për operatorët e industrisë së peshkimit.

Pasi e ka ndjekur fillin e këtij organizimi kriminal, OFL ka kryer mbrëmë operacionin e sekuestros dhe po vijon, në bashkëpunim me Strukturat e Specializuara të Hetimit Financiar, hetimin intensiv për zbulimin dhe dokumentimin e gjithë veprimtarisë kriminale në këtë fushë dhe lidhjen me persona të tjerë publikë e privatë.

OFL do informojë publikun në vijimësi për ecurinë e këtij operacioni të rëndësishëm, i cili tregon edhe njëherë se pasuritë kriminale nuk do të mbijetojnë në duart e subjekteve të Ligjit Special apo familjarëve e rrethit të bashkëpunëtorëve të tyre.”


Leave a Reply

Your email address will not be published. Required fields are marked *