Ministri i Brendshëm i Turqisë, Sulejman Soylu, njoftoi dorëheqjen lidhur me kaosin e shkaktuar pas vendosjes së kufizimeve të fundjavës lidhur me Covid-19.
“Në një proces të kryer me zell dhe përpikmëri, përgjegjësia për të gjithë zbatimin e shtetrrethimit të fundjavës për të frenuar pandeminë bie mbi mua në çdo aspekt,” shkroi Soylu në Twitter.
Soylu, i cili ka mbajtur postin që nga gushti 2016, tha se skenat që ndodhën pikërisht pas deklarimit të shtetrrethimit të premten në mbrëmje nuk pasqyrojnë zbatimin e asaj që ishte pritur.
Turqia njoftoi një shterrethim dy-ditor në fundjavë për të frenuar përhapjen e koronavirusit të ri. Megjithatë pas publikimit të planit, turma të mëdha njerëzish u dyndën në dyqane për të blerë produkte në orët e fundit para hyrjes në fuqi të shtetrrethimit.
Soylu tha se përgjegjësia për dyndjen e njerëzve në rrugë e dyqane ishte e tij. Mësohet se presidenti Erdogan nuk e ka pranuar dorëheqjen e ministrit.
