Ish-deputetja e Partisë Demokratike Albana Vokshi i ka dalë në mbrojtje pedagogut të Inxhinierisë së Ndërtimit Agim Seranaj i cili u shkarkua ditën e sotme nga pozicioni i Zv.dekanit.
Sipas Vokshit, shkarkimi i Seranajt erdhi me urdhër politik nga Edi Rama.
Për ish-deputeten, pedagogu i inxhinierisë ka evidentuar në mënyrë profesionale keqmenaxhimin e institucioneve duke mbrojtur interesin publik.
Postimi i plotë:
Zv.dekani i Fakultetit të Inxhinierisë së Ndërtimit, z. Agim Seranaj, është shkarkuar sot me urdhër politik të Edi Ramës.
Profesor Seranaj, një nga profesionistët dhe ekspertër më të mirë në vend, për shkak të eksperiencës së tij në këtë fushë, ka qenë pjesë e ekipeve shtetërore të vlerësimit, për të bere ekspertim të çerdheve dhe kopshteve apo institucioneve të tjera.
Ndryshe nga drejtuesit militantë apo ekspertët servilë, Prof Seranaj, ka folur publikisht për situatën aktuale të ndërtesave duke evidentuar në mënyrë profesionale keqmenaxhimin nga ana e institucioneve të situatës pas tërmetit dhe duke mbrojtur interesin publik.
Rama ka vendosur të censurojë jo vetëm mediat, me anë të paketës që sapo kaloi në parlament, por edhe cdo zë kritik që nxjerr zbuluar përgjegjësinë direkte të tij në numrin e madh të viktimave por edhe të ndërtesave e pallateve të shembura nga tërmetet. Tashmë ka vendosur të hakmerret edhe ndaj ekspertëve më të njohur duke urdhëruar shkarkimin e tyre nga detyra për shkak se i kanë prishur propagandën që kishte përgatitur.
Dënon me forcë veprimin e paligjshëm dhe prej ushtari politik të Dekanit të Fakultetit të Inxhinierisë së Ndërtimit Neritan Shkodrani, i cili pa dinjitet dhe integritet profesional, i është nënshtruar urdhërit politik të Edi Ramës, duke cënuar rëndë autonominë universitare.
Në emër të Partisë Demokratike i bëj thirrje trupës së pedagogëve dhe studentëve të Fakultetit të Inxhinierisë së Ndërtimit të reagojnë për këtë ndërhyrje flagrante në autonominë universitare dhe për veprimin prej ushtari politik të Dekanit të Fakultetit!
