Në mbledhjen e tetë të jashtëzakonshme të Këshillit të ministrave, kryeministri Edi Rama ka thënë se do të krijohen tre lagje krejtësisht të reja në Tiranë.
Rama tha se tre lagjet e reja do të krijohen në Kombinat, në rrugën “5 Maji” dhe në Shkozë. Ai tha se edhe në qytetin e Durrësit do të krijohet një lagje e re, po ashtu edhe në Laç.
“Në Durrës do të bëjmë një lagje komplet të re, kjo është shumë e qartë. Hapësirat ku ka pasur shembje do të kemi parqe, infrastrukturë sociale dhe arsimore, apo edhe në Tiranë jemi të qartë se duhet një ndërhyrje e fortë në Kombinat prishja e atyre godinave me probleme dhe ndërtimi i një blloku të ri banesash për të akomoduar ata njerëz.
Një pikë tjetër te “5 Maji” pranë lumit ku ne mund të bëjmë spostime, pa ju spostuar komplet jetën, aty do të bëjmë një lagje tjetër dhe tjera te ish-Uzina e Autotraktorëve (Shkozë). Këto tre pika ne plotësojnë nevojën. Me objektivin afat gjatë 10 mijë apartamente dhe afatshkurtër 5 mijë. Do të jenë lagje të reja sikur nuk ka sot në Shqipëri, kopshte, shkolla, çerdhe, kënde sportive me të gjitha. Lagje model, jo geto. Në Laç duhet të fillojmë shembjet, që të kemi po ashtu një lagje të re në gjithë atë zonë”.- tha Rama.
