Policia ka vënë në pranga një 38 vjeçar nga Elbasani, por që banonte në Shtutgart të Gjermanisë. Ai është arrestuar sepse akuzohet se ka trafikuar një automjet tip “Lamborghini Huracán”, e denoncuar si e vjedhur në shtetin gjerman.
“Falë një pune të mirëorganizuar nga burime të ndryshme operative, rezultoi se më datë 13.07.2019, në territorin e Shqipërisë ka hyrë nga një shtetas, një automjet i tipit “Lamborghini Huracán”. Ky mjet është deklaruar i vjedhur nga shteti gjerman më datë 30.07.2019. Shërbimet e Policisë pas kontrolleve të kryera, kanë konstatuar automjetin dhe menjëherë bën bllokimin e tij”, thuhet në njoftimin e policisë.
Operacioni “LUXURY CARS”, çoi në pranga shtetasin me iniciale M.D., 38 vjeç,ndërsa u shpall në kërkim edhe një tjetër shtetas me inicialet B.M., 43 vjeç, banues në Gjermani (i akuzuar për bashkëpunëtor).
Dy personat dyshohet se kanë bashkëpunuar për kryerjen e vjedhjes së automjetit luksoz në Gjermani me qëllim shitjen e tij në Shqipëri.
Automjeti tip “Lamborghini Huracán” i sekuestruar, ka një vlerë monetare rreth 250.000 euro.
