Kjo është video ne spital e dëshmisë së një qytetari për dhunën e policisë gjatë kontrolleve për arrestime pas konflikteve për votimet.
Korab Shehi tregon dhunën e ushtruar nga policia gjatë natës në Dibër, me maska dhe me armë. Dhuna e policisë nuk ka kursyer edhe gratë dhe fëmijët, sipas rrëfimit të tij dhe pamjeve.
“Ishte ora 03.00 e mëngjesit. Unë rri në kat të parë dhe në kat të dytë dhe të tretë i kishin thyer dyert të gjitha. Kur dola unë ata po zbritnin poshtë. Ishin me maska, kallashnikov dhe gjithçka. Në atë kohë u thashë: Çfarë është? Jo s’kemi punë, më tha kush je.
U thashë emrin, pastaj ata shkuan te nusja e kushëririt. Ngaqë e dija që ishte me 3 fëmijë të vegjël shkova atje.
Kur shkova atje, ata aty më shtynë, nuk më lanë dhe më përplasën për mur. Nuk më lanë që të shkoj aty. E dija që kishte për t’i rënë të fikët nuses së kushëririt.
Asaj i ra të fikët në rrugë, ndërsa djali i kushëririt shkoi të marrë makinën, policët I thanë; lëre të vdesë në rrugë, sepse i ra të fikët në rrugë. Policët na kanë godit mua dhe djalin e kushëririt, na kanë rrahur. I kanë futur dhe në furgon dhe i kanë rrahur me shkop gome, plus që e kanë godit dhe në fytyra”, tregon ai.
Dibra është zona më e nxehtë e konfliktit mes policisë dhe qytetarëve që kundërshtojnë votimet e nesërme.
