Vendosni fjalën kyçe....

Maqedonia e Veriut afër hapjes së negociatave në shtator, Shqipëria mbetet pas


Vendet anëtare të Bashkimit Evropian kanë vendosur ta shtyjnë për në shtator vendimin nëse do t’i hapin dritën e gjelbër fillimit të negociatave të anëtarësimit për Shqipërinë dhe Maqedoninë e Veriut. Sipas “EURACTIV, pothuajse të gjitha kryeqytetet janë përgatitur t’i japin dritën e gjelbër Shkupit, ndërsa Tirana ende mbetet me përgjigje “JO” për disa vende.

Vitin e kaluar, shtetet anëtare ranë dakord që BE të vendosë këtë qershor nëse do të fillojë bisedimet e anëtarësimit me të dyja vendet. Tani shihet si një provë e besueshmërisë për BE në rajonin e Ballkanit Perëndimor dhe më gjerë.

Komisioni rekomandoi në maj të fillonte bisedimet, duke pasur parasysh se Maqedonia Veriore dhe Shqipëria përmbushën të gjitha kërkesat për ta bërë këtë. Sapo të fillojnë bisedimet, procesi do të zgjasë për disa vite dhe madje edhe atëherë anëtarësimi nuk është i garantuar.

Megjithatë, Këshilli i Çështjeve të Përgjithshme nuk do të vendosë për çështjen të martën, pasi Gjermania nuk është gati të marrë një qëndrim sepse ende ka nevojë të përfundojë procesin e saj të brendshëm në parlament.

Si rezultat, zyrtarët e BE-së dhe diplomatët thanë për EURACTIV se vendimin do të shtyhet, me shumë gjasa deri në shtator.

Ndërkohë që po krijohet një konsensus për dhënien e “ecjes përpara” në Maqedoninë e Veriut, Shqipëria po lufton për të arritur njëzëshmërinë e kërkuar midis 28 vendeve. Shkupi lavdërohet në veçanti për arritjen e një marrëveshjeje historike me Greqinë në emër të saj, një çështje që ka bllokuar progresin me vite të tëra.

Një diplomat tha se nga 15 qeveritë që janë të gatshme për hapjen e negociatave, vetëm Italia ka aktualisht prirjen për të trajtuar së bashku dy fqinjët ballkanikë, ndërkohë që të tjerët janë të gatshëm t’i trajtojnë më vete, duke iu përgjigjur në këtë mënyrë mesazhit të Presidentit të Maqedonisë së Veriut, Stevo Pendarovski, i cili, javën e kaluar, foli për një ‘ndarje’ të vendit të tij nga Shqipëria për sa iu përket negociatave.