Pink ka deklaruar se nuk do të publikojë më fotografi të fëmijëve të saj në rrjetet sociale. Këngëtarja 39-vjeçarja bëri deklaratën që s’pritej ndërsa ishte e ftuar në emisionin “The Ellen Show”.
Ajo tha se e mori këtë vendim pas kritikave që ka marrë nga ndjekësit lidhur me aftësitë e saj prindërore. Pink u sulmua pas publikimit të fotoje të saj me fëmijët që admironin një pelikan që fluturonte në dhomën e tyre. Djali i saj 2-vjeçar, Jameson ishte pa pelena dhe ndjekësit e kritikuan për këtë, pavarësisht faktit se këngëtarja i mbuloi pjesët intime.
“Ne jetojmë në fermë. Fëmijët e mi qëndrojnë të zhveshur dhe kjo ndodh. Edhe unë ndonjëherë jam e zhveshur,”-shpjegoi Pink.
“Qava shumë nga komentet sepse më pëlqen të ndaj me fansat gjëra që kanë lidhje me familjen time. Jam krenare për fëmijët e mi dhe nuk do publikoj më asnjë foto të tyre.”, tha këngëtarja.