Pedagogët e Shkencave Sociale kanë vendosur të hyjnë në grevë pa afat.
Vendimi është marrë pas mbledhjes së personelit akademik të këtij fakulteti.
Në njoftimin zyrtar thuhet se “pedagogët e fakultetit të Shkencave Sociale të frymëzuar nga protesta studentore e të indinjaur nga mungesa e përgjigjes nga ana e Ministrisë së Arsimit për kërkesat kanë vendosur të hyjnë në grevë.”
3 vendimet që u morën
- Të nisim grevën e pedagogëve.
- T’u bëjmë thirrje asambleve të të gjitha fakulteteve të Universitetit të Tiranës që të mblidhemi sa më parë për të koordinuar veprimet.
- T’u bëjmë thirrje të gjitha asambleve dhe pedagogëve të universiteteve publike të Shqipërisë që t’i bashkohen grevës së përgjithshme universitare.
Paraditen e sotme një grup pedagogësh të Universitetit të Tiranës zhvilluan një takim me ministren e Arsimit, Shahini.
Ata shprehën mbështetje për kërkesat e studentëve, kundërshtuan ligjin e arsimit të lartë dhe kërkuan fillimin e procesit legjislativ për hartimin e ligjit të ri, kërkuan rritjen e buxhetit për arsimin e lartë publik dhe garantimin real të autonomisë financiare si dhe kërkuan ndalimin e menjëhershëm të fushatës denigruese dhe miratimin e statusit te pedagogëve.
