Eksperienca në Milano për Higuain, i prezantuar bujshëm katër muaj më parë si shpëtimtari i kuqezinjve, tashmë duket se është drejt fundit.
Sipas “Sportmediaset.it”, Milan dhe Chelsea po përfundojnë detajet e një shkëmbimi aspak të lehtë, por gjithsesi gati të paevitueshëm. Higuain në Londër te Sarri, ndërsa Alvaro Morata në Milano.
Dy janë skenarët e realizimit të shkëmbimit: I pari, Higuain te Chelsea në huazim, gjithmonë me miratimin e Juventus, me lirinë e zgjedhjes në qershor, për ta blerë ose jo, ndërsa në anën tjetër, Morata te Milan për 18 muaj, gjithmonë në huazim.
E dyta, shkëmbim huazimesh për gjashtë muaj dhe shkëmbim kartonash në barazi në qershor, me blerjen e Pipitas nga ana e Milan. Dy rrugë, me një konkluzion të vetëm logjik dhe në këtë moment të pakthyeshëm, argjentinasi shkon te Sarri, ndërsa spanjolli merr fanellën me numrin 9 te kuqezinjtë.
