Protesta e sotme në Astir është shoqëruar me përplasje mes banorëve dhe drejtuesve të automjeteve. I dëmtuar nga ngjarja ka mbetur një operator që po filmonte skenën.
Mësohet se një person që kishte mbetur i bllokuar në rrugë me makinë për shkak të protestës, ka dalë nga mjeti i irrituar dhe ka goditur në fytyrë me grusht dhe i ka dëmtuar kamerën operatorit, pasi ky i fundit ka qenë duke filmuar.
Operatori është dëmtuar në pjesën e syrit, ndërsa i është prishur edhe kamera me të cilën po filmonte.
Sot është dita e tetë e protestës së banorëve të Astirit, të cilët kanë dalë që në orën 10:00 për të kundërshtuar vendimin e qeverisë deri në marrjen e dëmshpërblimit.
