Katër persona u vranë dhe 70 të tjerë u plagosën nga sulme me mortaja dhe raketa të ndërmarra nga Pakistani kundër Afganistanit të hënën, njoftoi qeveria talebane, ndërsa përplasjet mes dy vendeve shpërthyen sërish dhe kërcënuan të minonin bisedimet e brishta të paqes.
Qeveria e Pakistanit i hodhi poshtë raportimet duke i quajtur “propagandë të vazhdueshme”.
Rreth 30 studentë, gra dhe fëmijë ishin mes të plagosurve nga sulmet, të cilat goditën shtëpi dhe Universitetin Syed Jamaluddin Afghani në qytetin Asadabad të provincës Kunar, tha zëvendës-zëdhënësi i talebanëve, Hamdullah Fitrat.
“Ne i dënojmë fuqishëm këto sulme nga regjimi ushtarak pakistanez, në të cilat u shënjestruan njerëz të zakonshëm, institucione akademike dhe arsimore, dhe i shpallim ato krime lufte të pafalshme,” tha ai në një postim në X.
Ministria e Informacionit e Pakistanit, në një postim në X, tha se akuzat e qeverisë afgane janë të pavërteta. “Sa herë dhe kudo që Pakistani godet infrastrukturën terroriste me bazë në Afganistan, kjo bëhet sipas praktikave të mëparshme, e shpallur qartë, e pranuar plotësisht dhe e mbështetur nga prova të sakta për shënjestrimin e infrastrukturës mbështetëse të terrorizmit,” thuhej në reagim.
Ushtria pakistaneze nuk iu përgjigj menjëherë një kërkese për koment.
Përplasjet më të rënda ndër vite shpërthyen mes aleatëve të kthyer në armiq në shkurt, me sulme ajrore pakistaneze brenda Afganistanit, të cilat Islamabadi tha se synonin baza të militantëve.
Islamabadi ka deklaruar se Kabuli u ofron strehë të sigurt militantëve që kryejnë sulme ndaj Pakistanit nga territori i tij. Talebanët i kanë mohuar këto akuza dhe kanë thënë se militantizmi në Pakistan është problem i brendshëm.
Më shumë se 400 persona u vranë në një sulm pakistanez ndaj një qendre rehabilitimi për drogën në Kabul muajin e kaluar, sipas talebanëve, përpara se fqinjët të pezullonin luftimet. Pakistani i hodhi poshtë këto deklarata, duke thënë se kishte “goditur me saktësi instalime ushtarake dhe infrastrukturë mbështetëse të terrorizmit”.
Misioni i Kombeve të Bashkuara për Asistencë në Afganistan e ka vendosur numrin e viktimave në 143.
Kina, e cila po ndërmjetësonte mes dy vendeve, tha më herët këtë muaj se ato kishin rënë dakord gjatë bisedimeve të paqes në Urumqi për të shqyrtuar një zgjidhje gjithëpërfshirëse për konfliktin e tyre.
Përplasjet janë zbutur që kur u njoftuan bisedimet në Urumqi, por ka pasur raportime për disa incidente të vogla. Tre persona u vranë nga granatimet me mortaja nga forcat afgane më 18 prill në rajonin verior Bajaur të Pakistanit, thanë zyrtarët e sigurisë, shkruan Reuters.
