Bashkimi Evropian dhe UNICEF kanë dërguar 100 ton ndihma humanitare në provincën Ituri të Republikës Demokratike të Kongos për të mbështetur përballimin e shpërthimit të Ebolës, përcjell Euronews.
Sipas UNICEF-it, ndihmat përfshijnë ilaçe thelbësore, pajisje mbrojtëse personale, materiale për parandalimin e infeksioneve, trajtime kundër kolerës dhe malaries, si dhe pajisje të tjera emergjente.
Ngarkesa humanitare u nis nga Liège në Belgjikë dhe pritet të ndihmojë rreth 100 mijë persona të prekur nga shpërthimi i virusit.
Komisionerja e BE-së për Menaxhimin e Krizave, Hadja Lahbib, deklaroi se situata përbën rrezik jo vetëm për rajonin dhe Kongon, por edhe për vendet fqinje.
Më 17 maj, Organizata Botërore e Shëndetësisë e shpalli shpërthimin e fundit të virusit Ebola të tipit Bundibugyo si emergjencë të shëndetit publik me shqetësim ndërkombëtar.
Aktualisht nuk ekziston as vaksinë dhe as trajtim specifik për virusin Bundibugyo, por BE-ja ka kontribuar me 7.4 milionë euro për zhvillimin e vaksinave dhe trajtimeve në bashkëpunim me OBSH-në.
Që prej shpërthimit të parë të regjistruar në vitin 1976, Republika Demokratike e Kongos ka përjetuar 17 shpërthime të Ebolës, nëntë prej tyre vetëm gjatë 16 viteve të fundit.
